වාහන හිමිකම මාරු නොකිරීම සහ වාහන ලියාපදිංචි සහතිකය රැගෙන නොයෑම සම්බන්ධයෙන් රියදුරකුට දඩ නියම කරන ආකාරය දැක්වෙන සමාජ මාධ්‍ය වීඩියෝ පටයක් සම්බන්ධයෙන් පොලිසිය පැහැදිලි කිරීමක් නිකුත් කර තිබේ.

සබරගමුව පළාතේ ධාවනය වූ, මධ්‍යම පළාතේ පුද්ගලයකුට ලියාපදිංචි කර ඇති රථයක අයිතිය සනාථ කරන ලියකියවිලි ලබාදෙන ලෙස රථවාහන රාජකාරියේ යෙදී සිටින පොලිස් නිලධාරිනියක් රියදුරකුගෙන් ඉල්ලා සිටින අයුරු අදාළ වීඩියෝවේ දක්නට ලැබේ.

පළාත් අතර වාහනයක් පැදවීම තහනම් දැයි රියදුරු ප්‍රශ්න කරන්නේ තමන් මාර්ග නීති කඩකර නොමැති බව පවසමිනි.

වාහනයේ අයිතිය වත්මන් හිමිකරුට පැවරීම වරදක් බව නිලධාරිනිය පැහැදිලි කරන අයුරු ද වීඩියෝවේ දක්නට ලැබිණි.

කුලියට ගත් වාහනයක් පැදවිය නොහැකිදැයි රියැදුරු කරන විමසීමට නිලධාරිනිය ප්‍රතිචාර දක්වමින් කියා සිටියේ එසේ හැකි වුවත් වාහන ලියාපදිංචි සහතිකය ඇතුළු අවශ්‍ය සියලුම ලියකියවිලි රැගෙන යා යුතු බවයි.

පොලිස් රථවාහන අංශයේ අධ්‍යක්ෂ ජ්‍යෙෂ්ඨ පොලිස් අධිකාරී මනෝජ් රණගල පවසන්නේ පළාත් අතර ගමන් කිරීමේදී වාහන ලියාපදිංචි සහතිකයක් රැගෙන යෑම අනිවාර්ය නොවන බවයි.

වලංගු රියදුරු බලපත්‍රයක්, රක්ෂණයක් සහ ආදායම් බලපත්‍රයක් වැනි අවශ්‍ය ලියකියවිලි ඇත්නම් ඕනෑම කෙනෙකුට පළාත් අතර ගමන් කිරීමට හෝ රටේ ඕනෑම තැනකට යෑමට බාධාවක් නැතැයි ජ්‍යෙෂ්ඨ පොලිස් අධිකාරී රණගල සඳහන් කර තිබේ.

රියදුරු බලපත්‍රය සහ රක්ෂණය වාහන හිමිකරුගේ නමට වඩා වෙනස් නම්වලින් තිබූ බැවින් හිමිකාරිත්වය පැවරීම පිළිබඳ පොලිස් නිලධාරිනිය රියදුරුගෙන් ප්‍රශ්න කර ඇති බව ජ්‍යෙෂ්ඨ පොලිස් අධිකාරී රණගල පැහැදිලි කළේය.