ශ්‍රී ලංකාවේ උපත් අනුපාතිකය ශීඝ්‍රයෙන් අඩුවෙමින් පවතින බවත් දැනට එය 30%කින් අඩු වී ඇති බවත් කළුබෝවිල ශික්ෂණ රෝහලේ නාරිවේද විශේෂඥ මහාචාර්ය අජිත් ප්‍රනාන්දු පවසයි.

මාධ්‍යවේදීන් හමුවේ වෛද්‍යවරයා කියා සිටියේ 360,000ක් පමණ වූ උපත් සංඛ්‍යාව 240,000ක් පමණ දක්වා අඩුවී ඇති බවයි.

රටේ උපත් අනුපාතිකය පහත වැටීමට මූලික හේතුව ආර්ථික අභියෝග බව වෛද්‍යවරයා පෙන්වාදෙයි.

මෙම ආර්ථික දුෂ්කරතා හේතුවෙන් බොහෝ පවුල් දෙවැනි දරුවකු බිහි නොකිරීමට තීරණය කරති.

“මේ දිනවල බොහෝ අලුත විවාහ වූ ජෝඩු දරුවන් ලැබීමේ අදහස කල් දමමින් සිටින බවක් පෙනෙන්නට තිබෙනවා. ඒ වෙනුවට ඔවුන් වැඩි ආදායමක් උපයා ගැනීමට ප්‍රමුඛත්වය දෙනවා, ඔවුන් පවුලක් ආරම්භ කිරීම ප්‍රමාද කරනවා. දරුවන් ලැබීම ඔවුන්ගේ ලැයිස්තුවේ ප්‍රමුඛතාවක් නෙවෙයි. සමහරු තෝරා ගන්නේ වෙනත් තැනකට සංක්‍රමණය වන්න. මෙහි හැදී වැඩෙන දරුවන් සම්බන්ධයෙන් ගත් කල, ඔවුන්ගෙන් බොහෝ දෙනෙක් ඔවුන්ගේ උසස් පෙළ විභාගයෙන් පසු විදේශගත වනවා, ආපසු පැමිණෙනවද යන්න අවිනිශ්චිතයි,” මහාචාර්ය ප්‍රනාන්දු පවසයි.

“අවාසනාවකට ඉහත දුෂ්කරතා නිසා රටේ උපත් අනුපාතිකය ශීඝ්‍රයෙන් පහත වැටීමක් පෙන්නුම් කරනවා. පවතින ජනගහනය පවත්වා ගැනීමට නම් රටේ උපත් මරණ අනුපාතය 2.1%ක් හෝ 2%ක් විය යුතුයි,” යැයි ඔහු පැවසීය.

මෙම ක්‍රියාව දිගටම පැවතුනහොත් වසර කිහිපයකට පසු කොරියාව, චීනය වැනි සංවර්ධිත රටවලට මුහුණ පෑමට සිදුවන දුෂ්කරතාවලට ශ්‍රී ලංකාවටද මුහුණ දීමට සිදුවනු ඇති බවද ඔහු වැඩිදුරටත් පැවසීය.

“මෙය අපේ රට අසීරු තත්ත්වයකට ගෙන යන්න පුළුවන්. ඇතැම් අය අඩු උපත් අනුපාතිකය සංවර්ධිත රටවල ලක්‍ෂණයක් ලෙස දකිනවා. නමුත් අපේ රටේ සිදුව ඇත්තේ සංවර්ධිත රටක වන දෙය නෙවෙයි,” යනුවෙන් මහාචාර්ය ප්‍රනාන්දු පැවසීය.