ජයග්‍රාහී ශ්‍රී ලංකා ජාතික කාන්තා ක්‍රිකට් කණ්ඩායම 2024 ICC කාන්තා T20 ලෝක කුසලානයේ සිය ස්ථානය තහවුරු කර ගැනීමෙන් පසු අද යළි දිවයිනට පැමිණියේය.

එළඹෙන T20 කාන්තා ක්‍රිකට් ලෝක කුසලානය සඳහා කණ්ඩායම් තෝරා ගැනීමේ තරඟාවලිය කණ්ඩායම් 10ක් සමගින් අබුඩාබිහිදී පැවැත්විණි.

තියුණු තරගයකින් පසුව ශ්‍රී ලංකාව සහ ස්කොට්ලන්තය කීර්තිමත් තරගාවලියේ ස්ථාන තහවුරු කර ගනිමින් ජයග්‍රහණ අත්කර ගත්හ.

අබුඩාබි හිදී පැවැත්වෙන අවසන් පූර්ව තරගයේ කාසියේ වාසිය දිනාගත් ස්කොට්ලන්ත කාන්තා ක්‍රිකට් නායිකා සාරා බ්‍රයිස් පළමුව පන්දු යැවීමට තීරණය කළාය.

නායිකා චමරි අතපත්තුගේ විශිෂ්ට දස්කම් සමග ශ්‍රී ලංකා කණ්ඩායම නියමිත පන්දුවාර 20 තුළ කඩුලු 5ක් දැවී ලකුණු 169ක් ලබා ගැනීමට සමත් විය.

චමරි අතපත්තු පන්දු 63කදී ලකුණු 102ක් ලබා ගනිමින් විශිෂ්ට පිතිහරඹයක නිරත වූවාය.

ප්‍රතිචාර වශයෙන් ස්කොට්ලන්ත ක්‍රීඩිකාවන්ට කඩුලු 7ක් දැවී ලබාගත හැකි වූයේ ලකුණු 101ක් පමණි.

උදේශිකා ප්‍රබෝධනීගේ විශිෂ්ට පන්දු යැවීම ශ්‍රී ලංකා ජයග්‍රහණයට බෙහෙවින් දායක වූ අතර ඇය තීරණාත්මක කඩුලු 3කට හිමිකම් කීවාය.

මෙම ජයග්‍රහණයත් සමඟ ශ්‍රී ලංකාව එළැඹෙන T20 කාන්තා ලෝක කුසලාන තරගාවලියේදී ඔස්ට්‍රේලියාව, ඉන්දියාව, නවසීලන්තය සහ පාකිස්ථානය වැනි ප්‍රබල ප්‍රතිවාදීන් සමඟ A කාණ්ඩයෙන් තරග කිරීමේ ගෞරවය හිමිකරගෙන ඇත.

ඔක්තෝබර් 3 වැනිදා ආරම්භ වීමට නියමිත මෙම තරගාවලියට මේ වසරේ සත්කාරකත්වය දරන්නේ බංග්ලාදේශයයි.