මියන්මාරයේ සයිබර් වහල් කඳවුරකින් මුදාගත් ශ්‍රී ලාංකිකයන් අට දෙනා මේ වනවිට තායිලන්තය හරහා ශ්‍රී ලංකාවට පැමිණීමට සූදානමින් සිටින බව මියන්මාරයේ ශ්‍රී ලංකා තානාපතිවරයා තහවුරු කර තිබේ.

තායි බලධාරීහු මෙම පිරිස සඳහා සංක්‍රමණ වීසා නිකුත් කර ඇති අතර, ඔවුන්ට ආරක්ෂිතව ආපසු සිය රටට යෑමට ද පහසුකම් සලසමින් සිටිති.

තායි මියන්මාර දේශසීමාවේ සන්නද්ධ කණ්ඩායමක් විසින් පාලනය කරනු ලබන ප්‍රදේශයක ශ්‍රී ලාංකික තරුණයන් 56 දෙනෙකු රඳවා සිටින බව මීට මාස කිහිපයකට පෙර මාධ්‍ය වාර්තා කර තිබිණි.

පසුව අනාවරණ වූයේ මෙම පුද්ගලයන් සයිබර් අපරාධවල නිරත වූවන් බවයි.

කෙසේවෙතත්, සිදු කරන ලද පරීක්ෂණවල දී ඔවුන්ගෙන් 8 දෙනෙකු නිදහස් කර ගැනීමට හැකි විය.

දැනට මෙම පුද්ගලයන් අට දෙනා මියන්මාරයේ Myawaddy හි මධ්‍යම පොලිස් ස්ථානයේ රඳවා ඇත.

මියන්මාරයේ ශ්‍රී ලංකා තානාපතිවරයා තහවුරු කර ඇත්තේ මෙම කණ්ඩායම කිසියම් අපරාධ ක්‍රියාවකට සම්බන්ධදැයි සොයා බැලීම සඳහා පරීක්ෂණ ක්‍රියාත්මක බවයි.

“පරීක්‍ෂණයෙන් අනතුරුව, ආගමන විගමන දෙපාර්තමේන්තුව ඔවුන්ට එරෙහිව නීතිමය ක්‍රියාමාර්ග නොගන්නා බවත්, ඔවුන් වින්දිතයන් ලෙස සළකන බවත් දන්වා තිබෙනවා. ඒ අනුව, ඔවුන් ශ්‍රී ලංකාවට ගෙන්වා ගැනීමට මියන්මාර රජයෙන් කිසිදු විරෝධයක් නැහැ. කෙසේවෙතත්, ගමන Myawaddy සිට Yangun දක්වා වූ ගැටලුසහගත ප්‍රදේශ හරහා වැටී තිබෙන්නේ. එම නිසා ඔවුන් තායිලන්තය හරහා ආපසු ගෙන්වා ගන්නා ලෙස මියන්මාර රජය අපට දන්වා තිබෙනවා,” යනුවෙන් මියන්මාරයේ ශ්‍රී ලංකා තානාපති ජනක බණ්ඩාර සඳහන් කළේය.

තායි දේශසීමාව ආසන්නයේ, ආසන්න වශයෙන් කිලෝමීටර් 5 ක් පමණ දුරින් පිහිටා ඇති මෝයි ගඟ අසල ස්ථානයක තවත් ශ්‍රී ලාංකිකයන් 18 දෙනෙකු වහල්භාවයේ තබාගෙන සිටින බව වාර්තා වී තිබේ.

Myawaddy නගරයේ සිට ආසන්න වශයෙන් කිලෝමීටර් 26ක් දුරින් තවත් ශ්‍රී ලාංකික තරුණයන් 28 දෙනෙකු නවාතැන් ගෙන ඇත.

තරුණ රැඳවියන් විසින් විඳදරාගත් වධහිංසා පිළිබඳ වාර්තා සමඟ, ස්ථාන තුනම දරුණු බවට සලකුණු කර ඇත.

සිරගතව සිටින මෙම තරුණයන් 28 දෙනාගේ මාපියන් සමඟ සම්බන්ධකම් පැවැත්වූ ශ්‍රී ලාංකිකයකු එම ස්ථානයට ඇතුළු වී දර්ශන ලබා ගැනීමට සමත් වීම විශේෂත්වයකි.

මෙම දුක්ඛිත “වහල් කඳවුරට” ළඟා වීමට තායිලන්තයේ සිට මෝයි ගඟ තරණය කළ බව ඔහු ප්‍රකාශ කර තිබිණි.