කෘෂිකාර්මික කටයුතු සහ විවිධ කාර්මික කටයුතුවල නිරත වීමට සිරකරුවන්ට පහසුකම් සැලසීමෙන් බන්ධනාගාර දෙපාර්තමේන්තුව 2023 වසරේදී රුපියල් මිලියන 253කට අධික ආදායමක් උපයා තිබේ.

බන්ධනාගාර කොමසාරිස් ජනරාල් තුෂාර උපුල්දෙණිය පවසා ඇත්තේ, 2023 වසර තුළදී ‘කෘෂිකාර්මික ප්‍රතිකාර’ සඳහා රැඳවියන් යොමුකිරීමෙන් රුපියල් මිලියන 90කට අධික මුදලක් උපයාගෙන ඇති බවයි.

‘කෘෂිකාර්මික චිකිත්සාව’ යනු සමාජීය, මානසික හා කායික ගැටලුවලින් පෙළෙන පුද්ගලයන්ට උපකාර කිරීම සඳහා භාවිත කරන ක්‍රමයක් බව ඔහු පැහැදිලි කර ඇත.

හෙතෙම පෙන්වාදෙන්නේ, බන්ධනාගාර රැඳවියන් භෝග වගා කිරීමට සහ ඒවා රැකබලා ගැනීමට යෙදවීමෙන් ඔවුන්ගේ යහපත් හැසිරීම් දිරිමත් වන අතරම සිරගතව සිටින රැඳවියන් බන්ධනාගාරය තුළ සාමාන්‍ය ජීවන රටාවකට හුරු වීමට එය උපකාර වන බවයි.

බන්ධනාගාරය අවසානයේ සමාජයට ඒකාබද්ධ වූ විට එය ඔවුන්ට ප්‍රයෝජනවත් වන බව ද ඔහු සඳහන් කරයි.

එක්සත් ජනපදය, දකුණු කොරියාව සහ යුරෝපය යන රටවල සිදුකරන ලද පර්යේෂණවලින් හෙළි වී ඇත්තේ සිරකරුවන් 7 දෙනෙකුගෙන් එක් අයෙකු මනෝ ව්‍යාධියෙන් පෙළෙන බව හෝ සායනික මානසික අවපීඩනයෙන් පෙළෙන බවයි.

‘කෘෂිකාර්මික ප්‍රතිකාර’ සඳහා රැඳවියන් යොමුකිරීම ඔවුන්ට උපකාරී වන බව ද එම පර්යේෂණවලින් හෙළි වී තිබේ.

“සිරකරුවන්ට තමන් අතහැර දාලා කියලයි හිතෙන්නේ, ඔවුන්ට පෞද්ගලිකත්වය පිළිබඳ හැඟීම නැතිවෙනවා, අර්ථවත් ක්‍රියාකාරකම් නොමැතිකම වගේම ඔවුන් සිරගත කර සිටින විට සමාජ අන්තර්ක්‍රියා මගහැරෙනවා. ඒ නිසා නිදහස් වුණාම ඔවුන්ට නැවත සමාජයට හැඩ ගැහෙන්න අමාරුයි. කෘෂිකාර්මික චිකිත්සාව එවැනි ගැටලු වළක්වා ගැනීමට උපකාරී වනවා, ” යැයි ඔහු සඳහන් කරයි.

පල්ලන්සේන, පල්ලෙකැලේ, වීරවිල, තල්දෙන, කුරුඳුගස්ආර, කුරුවිට, අනුරාධපුර, හංගිලිපොල, වාරියපොළ, වටරැක , කන්දේවත්ත, මඩකලපුව සහ පිටබද්දර යන ප්‍රදේශවල පිහිටි සිර කඳවුරු 13කදී මෙම වැඩසටහන් ක්‍රියාත්මක වේ.