ඉදිරි ජනාධිපතිවරණය සහ පාර්ලිමේන්තු මැතිවරණය සඳහා මැතිවරණ කොමිෂන් සභාව ඉල්ලා ඇති අයවැයෙන් අඩකට ආසන්න ප්‍රමාණයකට රජයෙන් එකඟතාවක් ලැබී ඇති බව විශ්වාස කටයුතු ආරංචි මාර්ගවලින් වාර්තා වේ.

මැතිවරණ කොමිෂන් සභාව විසින් ජනාධිපතිවරණය සහ පාර්ලිමේන්තු මැතිවරණ යන දෙකටම අදාළ වියදම් පියවා ගැනීම සඳහා රුපියල් බිලියන 21ක අයවැය යෝජනාවක් ඉදිරිපත් කර තිබිණි.

කෙසේවෙතත්, රුපියල් බිලියන 10ක් රජය විසින් මේ අවස්ථාවේදී අනුමත කර ඇත.

මැතිවරණ කොමිෂන් සභා සභාපති ආර්.එම්.ඒ.එල්. රත්නායක තහවුරු කළේ ඉදිරි ජනාධිපතිවරණය සඳහා අනුමත කරන ලද රුපියල් බිලියන 10 අයවැයෙන් වෙන් කර ඇති බවයි.

2025 දී පැවැත්වීමට නියමිත පාර්ලිමේන්තු මැතිවරණය සඳහා ඉතිරි රුපියල් බිලියන 11ක මුදල ඉදිරි මුදල් වර්ෂයේ දී වෙන් කිරීමට අපේක්ෂා කෙරේ.

මහ මැතිවරණයට තවත් මාස 15කට ආසන්න කාලයක් ඉතිරිව තිබියදී ඒ සඳහා සූදානම් වෙමින් පවතින බවද මැතිවරණ කොමිෂන් සභා සභාපති රත්නායක අවධාරණය කළේය.

ජනාධිපතිවරණය සම්බන්ධයෙන් ඔහු ප්‍රකාශ කළේ ආණ්ඩුක්‍රම ව්‍යවස්ථාවට අනුව මැතිවරණ දිනය ප්‍රකාශයට පත්කරන බවයි.

2025 මහ මැතිවරණය පැවැත්වීමට නියමිත අතර, මෙම වසරේ සැප්තැම්බර් 16 සිට ඔක්තෝබර් 17 දක්වා කාලය තුළ ජනාධිපතිවරණය පැවැත්වෙනු ඇති බව වාර්තා පෙන්වා දෙයි.

ජනාධිපති රනිල් වික්‍රමසිංහ විසින් ජනාධිපතිවරණ සහ පාර්ලිමේන්තු මැතිවරණය යන දෙකෙහිම ස්ථිර කාලසටහන පසුගියදා පාර්ලිමේන්තුවට දැනුම් දුන්නේය.