අනාගත ජාතික ජන බලවේග පාලනයක් විසින් දේශපාලනඥයන්ගේ මහජන මුදල් අවභාවිතය නතර කරන බව පවසමින් ජාජබ නායක අනුර කුමාර දිසානායක ප්‍රකාශ කළේ, ජනාධිපතිවරයාගේ විශාල ආරක්ෂාව සහ දේශපාලනඥයන් භාවිත කරන මිල අධික වාහන තොගය සංචිතය එම කාර්යයන්වලින් ඉවත් කරන බවයි.

හම්බන්තොට දිස්ත්‍රික් කාන්තා සම්මේලනය අමතමින් ඊයේ ඔහු කියාසිටියේ මහජන මුදල් සතයක්වත් අයථා ලෙස පරිහරණය කිරීමට හෝ කොල්ලකෑමට කටයුතු නොකරන බව ජනතා විමුක්ති පෙරමුණ ප්‍රායෝගිකව ඔප්පු කර ජනතාවට ආදර්ශයක් ලබාදෙන බවයි.

“ජනාධිපතිවරයාගේ ආරක්ෂාවට හමුදා සහ පොලිස් කණ්ඩායම් දහස් ගණනක් යොදවා තිබෙනවා. ග්‍රාමීය මට්ටමේ පොලිස් ස්ථානවල සිටින්නේ පොලිස් නිලධාරීන් 10 දෙනකු වගේ සංඛ්‍යාවක් පමණයි. අපි ජනාධිපතිවරයාගේ ආරක්‍ෂාවට සිටින නිලධාරීන් ගාලු මුවදොරට ගෙනැල්ලා විසුරුවා හැරලා ගම්වල පොලිස් ස්ථානවලට යවනවා.

ජනාධිපතිවරයා ඇතුළු දේශපාලනඥයන් පාවිච්චි කරන්නේ ලීටරයකට කිලෝමීටර් දෙක තුනක් දුවන මිල අධික වාහන. එවැනි මිල අධික වාහන භාවිතය අපි නවත්වනවා. රටේ ඉදිකිරීම් කටයුතුවල සහ සංවර්ධනයේ විනිවිදභාවය අපි සහතික කරනවා. අපි ජනතාවට ආදර්ශයක් දෙනවා. ඒ අයටත් අනුගමනය කරන්න, ඉදිරියට ඇවිත් රට වෙනුවෙන් තමන්ගේ යුතුකම ඉටු කරන්න පුළුවන්” යැයි හෙතෙම පැවැසීය.

ඉදිරි මැතිවරණය දේශපාලන පක්ෂයකට ඡන්දය දී ආණ්ඩුවක් පිහිටුවීමේ තවත් මැතිවරණයක් නොවන බවත්, එය දූෂිත හා විනාශකාරී පාලකයන්ගෙන් රට මුදාගැනීමේ අරගලයක් බවත් හෙතෙම අවධාරණය කළේය.