ඉදිරි වසර දෙක තුළ විදේශ ණය සේවාකරණ වගකීම් පියවීමට අවශ්‍ය ද්‍රවශීලතාව සහ මූල්‍ය ශක්තිය රජය සතුව පවතින බව ජනාධිපති අනුර කුමාර දිසානායක පවසයි.

2027 වසර සඳහා වන අයවැය යෝජනා අද පාර්ලිමේන්තුවට ඉදිරිපත් කරමින් ජනාධිපතිවරයා මේ බව සඳහන් කළේය. 2025 සහ 2026 වසරවලදී ගෙවූ මුදලට සාපේක්ෂව ඉදිරි වසර දෙක තුළ රජයට ගෙවීමට සිදුවන්නේ අඩු විදේශ ණය ප්‍රමාණයක් බව ද ඔහු එහිදී පෙන්වා දුන්නේය.

රජය 2025 වසරේදී අමෙරිකානු ඩොලර් මිලියන 3,707 ක විදේශ ණය ගෙවා ඇති බවත්, 2026 වසරේදී ඩොලර් මිලියන 3,591 ක් ගෙවීමට නියමිතව ඇති බවත් ජනාධිපතිවරයා අනාවරණය කළේය. ඒ අනුව, 2027 වසරේදී රජයේ විදේශ ණය ගෙවීමේ අවශ්‍යතාව අමෙරිකානු ඩොලර් මිලියන 2,986 ක් වන අතර, 2028 වසර සඳහා ඩොලර් මිලියන 3,674 ක් අවශ්‍ය වන බව ඔහු සඳහන් කළේය.

සිය වගකීම් ඉටු කිරීමට රජයට ඇති හැකියාව පිළිබඳව ඇතැම් පාර්ශ්ව ප්‍රශ්න කළද, ඉදිරි වසර දෙක තුළ විදේශ ණය ගෙවීමට අවශ්‍ය ද්‍රවශීලතාව සහ මූල්‍ය හැකියාව රජය සතු බව ජනාධිපති දිසානායක මහතා අවධාරණය කළේය. ආර්ථිකය යථා තත්ත්වයට පත් කිරීමේ වැඩපිළිවෙළ අඛණ්ඩව ඉදිරියට ගෙන යන අතරතුරම විදේශ ණය වගකීම් සපුරාලීමට රජයට හැකි වනු ඇතැයි ද ඔහු විශ්වාසය පළ කළේය.

2027 අයවැය, ජාතික ජන බලවේගය ප්‍රමුඛ රජය විසින් ඉදිරිපත් කරන ලද තෙවන අයවැය වන අතර, එම අයවැය යෝජනා සඳහා අද පෙරවරුවේ අමාත්‍ය මණ්ඩල අනුමැතිය හිමි විය.