පවතින දැඩි ආර්ථික මන්දගාමිත්වය හමුවේ චීනයේ ණය කාඩ්පත් (Credit Cards) හිඟ මුදල් පියවීම පැහැර හැරීමේ නරකම වාර්තාවක් සටහන් වන අතර, ඊට සෘජුවම වගකිව යුතු පිරිස ලෙස විශ්වවිද්‍යාල අධ්‍යාපනය ලත් මධ්‍යම වයසේ රාජ්‍ය අංශයේ නිලධාරීන් හඳුනාගෙන තිබේ.

මීට පෙර මූල්‍යමය වශයෙන් ඉතා සුරක්ෂිත සහ යහපත් ණයගැතියන් ලෙස සැලකූ මෙම පිරිස වෙත චීන බැංකු විසින් උනන්දුවෙන්ම ණය පහසුකම් ලබාදී තිබුණි. එහෙත් වර්තමානයේ මෙම අලාභ වූ ණය ශීඝ්‍රයෙන් ඉහළ යාම හේතුවෙන් ඒවා තම වත්කම්වලින් ඉවත් කර ගැනීමට බැංකුවලට දැඩි උත්සාහයක නිරත වීමට සිදුව ඇත.

චීනයේ බැංකු ණය වත්කම් ලියාපදිංචි කිරීමේ සහ සංසරණ මධ්‍යස්ථානයේ දත්තවලට අනුව පසුගිය මාස තුනක කාලය තුළ ලියාපදිංචි වූ අලාභ වූ ණය ප්‍රමාණය සියයට 50 කට ආසන්න අගයකින් ඉහළ ගොස් ඇත.

2026 වසරේ තෙවන කාර්තුව වන විට මෙලෙස අලුතින් එක්වූ අලාභ ණය ප්‍රමාණය යුවාන් බිලියන 148.1 ක් (ඇමරිකානු ඩොලර් බිලියන 22.2 ක්) දක්වා වර්ධනය වී තිබේ.

එම සමස්ත ණය අතුරින් සියයට 35.2 ක්ම ණය කාඩ්පත් හිඟ මුදල් වන අතර, එය වාර්තා වූ විශාලතම තනි ණය කාණ්ඩයයි.

මෙලෙස ණය ගෙවීම පැහැර හැර ඇති බහුතරයක් ණය කාඩ්පත් හිමියන් අවුරුදු 40 ත් 50 ත් අතර වයස්වල පසුවන්නන් බව Ping An ඇතුළු ප්‍රමුඛ බැංකු සඳහන් කරයි.

සාමාන්‍යයෙන් ඇමරිකා එක්සත් ජනපදය වැනි රටවල ණය කාඩ්පත් වාරික පැහැර හැරීම් බහුලව දක්නට ලැබෙන්නේ තරුණ පරම්පරාව අතර වන අතර, ඊට සම්පූර්ණයෙන්ම පටහැනි ලෙස චීනයේ මධ්‍යම වයසේ පසුවන්නන් මෙලෙස වැඩිම මූල්‍ය අවදානමක් මතු කිරීම ආර්ථික විශ්ලේෂකයන්ගේ දැඩි අවධානයට ලක්ව ඇත.