ඉරානයේ සහය ලබමින් යේමනයේ ක්‍රියාත්මක වන හූති කැරලිකරුවන් චීන උපාංගවල සහාය ඇතිව නවතම, දියුණු මධ්‍යම පරාස බැලැස්ටික් මිසයිල පද්ධතියක් නිෂ්පාදනය කිරීමට උත්සාහ කරමින් සිටින බව යුද ගැටුම් කලාපවල ආයුධ භාවිතය පිළිබඳ පරීක්ෂණ පවත්වන ආයතනයක් විසින් නිකුත් කරන ලද අලුත්ම වාර්තාවක සඳහන් වේ.

එක්සත් රාජධානිය පදනම් කරගත් Conflict Armament Research ආයතනය විසින් මෙම වාර්තාව නිකුත් කර ඇත්තේ, සෞදි අරාබිය සමඟ පවතින දීර්ඝකාලීන යුද්ධයේදී මැදපෙරදිග හොඳින්ම සන්නද්ධ වූ හමුදාවකට පවා දැඩි තර්ජනයක් එල්ල කිරීමට හූති කැරලිකරුවන් දක්වන සුවිශේෂී හැකියාව පෙන්නුම් කරමින් සිටින වටපිටාවකය.

ඉදිකෙරෙමින් පවතින මෙම නව ආයුධ පද්ධතිය මගින් සවුදි අරාබියට සහ ඊශ්‍රායලයට වඩාත් ඉලක්කගත ලෙස ප්‍රහාර එල්ල කිරීමට හූති සටන්කාමීන්ට හැකියාව ලැබෙනු ඇත. එමෙන්ම චීනය දෙසට යොමු වීම මගින් ඔවුන්ගේ ස්වාධීනත්වය වැඩිවන බවට ද සංඥා කෙරේ. මෙම වාර්තාවට අනුව, ඉරානයේ ‘කෙයිබාර් ෂෙකාන්’ නමැති නිරවද්‍ය ඉලක්කගත මිසයිලයේ නව සංස්කරණයක් නිෂ්පාදනය කිරීම සඳහා අවශ්‍ය ප්‍රධාන කොටස් චීන සැපයුම්කරුවන්ගෙන් ලබා ගැනීමට හූති කැරලිකරුවන් උත්සාහ කර ඇත. ‘කෙයිබාර් ෂෙකාන්’ මිසයිලය කිලෝමීටර් 2,000ක පමණ විහිදුම් පරාසයකින් යුක්ත වේ.

“ආයුධ නිෂ්පාදනය සම්බන්ධයෙන් හූති කැරලිකරුවන්ගේ දේශීය අභිලාෂයන් මීට පෙර උපකල්පනය කර තිබූ පරාසයට සාපේක්ෂව බෙහෙවින් ඉහළ මට්ටමක පවතින බව ලොව පුරා යුද කලාපවල ආයුධ ගමනාගමනය සෙවීම පිළිබඳ විශේෂඥතාවක් ඇති ‘කොන්ෆ්ලික්ට් ආමමන්ට් රිසර්ච්’ ආයතනයේ ජ්‍යෙෂ්ඨ විශ්ලේෂක ෆේබියන් හින්ට්ස් පැවසීය.