ඕස්ට්‍රේලියාව සහ ඉන්දියාව අතර ද්විපාර්ශ්වික ආරක්ෂක සහයෝගීතාව ශක්තිමත් කිරීම සහ දෙරටේ හමුදාවන් අතර සබඳතා තවදුරටත් පුළුල් කිරීම අරමුණු කරගනිමින් පැවැත්වුණු 13 වන යුධ හමුදා මූලස්ථාන මට්ටමේ සාකච්ඡා නව දිල්ලියේදී සාර්ථකව පැවැත්විණි.

දින තුනක් පුරා පැවැත්වුණු මෙම සාකච්ඡා වටය සැප්තැම්බර් 28 සිට 30 දක්වා පැවැත්වුණු අතර, ඒ සඳහා ඉන්දීය සහ ඕස්ට්‍රේලියානු හමුදා උසස් නිලධාරීන් රැසක් සහභාගී වූහ.

එහිදී දෙරටටම පොදු උනන්දුවක් පවතින ආරක්ෂක ක්ෂේත්‍ර රැසක් පිළිබඳව දීර්ඝ වශයෙන් අදහස් හුවමාරු කරගන්නා ලදී.

දෙරටේ හමුදාවන් අතර පවතින දැඩි විශ්වාසය සහ ශක්තිමත් පරස්පර සබඳතාව මෙම සාකච්ඡා හරහා නැවත වරක් තහවුරු වූ බව ඉන්දීය යුධ හමුදාවේ මහජන තොරතුරු අතිරේක අධ්‍‍යක්ෂ ජනරාල් කාර්යාලය ප්‍රකාශ කළේය.

එමෙන්ම ද්විපාර්ශ්වික ආරක්ෂක සහයෝගීතාව තවදුරටත් වර්ධනය කරගැනීමටත්, ඒකාබද්ධ වැඩසටහන්වල විෂය පථය සහ ප්‍රමාණය ඉහළ නැංවීමටත් මෙහිදී අවධානය යොමු වූ බව ද එම කාර්යාලය වැඩිදුරටත් සඳහන් කළේය.

මෙම නිල සංචාරයේ අංගයක් ලෙස ඕස්ට්‍රේලියානු නියෝජිත පිරිස නව දිල්ලියේ පිහිටි ගොඩබිම් යුධ අධ්‍යයන මධ්‍යස්ථානයේ සංචාරයක නිරත වූ අතර, එහිදී කාලීන ආරක්ෂක අභියෝග පිළිබඳව විශේෂ සාකච්ඡාවක් ද පවත්වන ලදී. මීට අමතරව, ඔවුන් ජාතික යුධ ස්මාරකය වෙත ගොස් මියගිය විරුවන්ට පුෂ්පෝපහාර දැක්වීමට ද කටයුතු කළහ.