October 1, 2026
ඉන්දීය අග්‍රාමාත්‍ය නරේන්ද්‍ර මෝදි සහ ඇමරිකානු ජනාධිපති ඩොනල්ඩ් ට්‍රම්ප් අතර බදාදා දින පැවැති සෘජු දුරකථන සංවාදයෙන් අනතුරුව, ඇමරිකානු තානාපති සර්ජියෝ ගෝර් ඒ පිළිබඳව කෙටි ප්‍රතිචාරයක් දක්වා තිබේ.
තම X ගිණුමේ සටහනක් තබමින් ඔහු එම සංවාදය ඉතා යහපත් සංවාදයක් ලෙස හඳුන්වා දී ඇත.
නායකයින් දෙපළ වෙළෙඳ කටයුතු, ආරක්ෂක ගිවිසුම්, බලශක්ති සැපයුම් සහ නැගී එන තාක්ෂණයන් ඇතුළු ද්විපාර්ශ්වික සහයෝගිතාවේ ප්‍රායෝගික ක්ෂේත්‍ර රැසක් පිළිබඳව මෙහිදී අවධානය යොමු කර ඇත.
මීට අමතරව, කලාපීය වර්ධනයන් සහ ගෝලීය ස්ථාවරත්වය තහවුරු කිරීම සඳහා ගතයුතු පියවර පිළිබඳවද ඔවුහු අදහස් හුවමාරු කරගත්හ.
මෙම සාකච්ඡාවෙන් පසු X ගිණුමේ සටහනක් තබමින් අග්‍රාමාත්‍ය මෝදි සඳහන් කළේ මෙම අදහස් හුවමාරුව ඉතා ඵලදායී වූ බවයි. පවත්නා විස්තීර්ණ ගෝලීය උපායමාර්ගික සබඳතා තවදුරටත් වර්ධනය කරගැනීම සඳහා දෙපාර්ශ්වයම අඛණ්ඩව සාකච්ඡා පවත්වන බව ඔහු වැඩිදුරටත් පැවසීය.
ඉන්දීය අග්‍රාමාත්‍ය කාර්යාලයද පසුව නිවේදනයක් නිකුත් කරමින් කියා සිටියේ නායකයින් දෙපළ ඉදිරියටත් නිරන්තර සන්නිවේදනය පවත්වා ගැනීමට සැලසුම් කර ඇති බවයි.
දෙරට අතර පවතින සබඳතාවන්ගේ අඛණ්ඩ වර්ධනය පසුබිම් කරගනිමින් මෙම හමුව සිදුවී ඇත. වත්මන් ඇමරිකානු පරිපාලනයේ ජ්‍යෙෂ්ඨ නිලධාරීන් මීට පෙරද ඉදිරි අනාගතයේදී දෙරට අතර සිදුවීමට නියමිත පියවර රැසක් පිළිබඳව ඉඟි කර තිබුණි.
