ඉන්දීය විදේශ කටයුතු අමාත්‍ය එස්. ජයිශංකර්, ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා ඇතුළු ශ්‍රී ලාංකික නියෝජිත පිරිස අද උදෑසන හමුවිය.

ජනතා විමුක්ති පෙරමුණ සහ භාරතීය ජනතා පක්ෂය අතර පැවැත්වෙන හමුවීම්වල කොටසක් ලෙස, ශ්‍රී ලංකාවේ පාලක ජනතා විමුක්ති පෙරමුණේ පස්දෙනෙකුගෙන් යුත් නියෝජිත පිරිසක් 2026 සැප්තැම්බර් 27 සිට ඔක්තෝබර් 01 දක්වා දින පහක සංචාරයක් සඳහා ඉන්දියාවට ගොස් සිටිති.

ටිල්වින් සිල්වා සමඟ පැවැත්වූ සාකච්ඡාවෙන් අනතුරුව, ජයිශංකර් සිය ‘X’ (ට්විටර්) ගිණුමේ සටහනක් තබමින් කියාසිටියේ, ශ්‍රී ලංකා නියෝජිත පිරිස හමුවීමට ලැබීම සතුටක් බවයි.

“අපගේ ගැඹුරු මිත්‍රත්වයේ සබඳතා තවදුරටත් ශක්තිමත් කර ගැනීම පිළිබඳව යහපත් සාකච්ඡාවක් පැවැත්වුණා” යැයි ඔහු සිය ‘X’ සටහනේ සඳහන් කළේය.

“විශ්වාසනීය සහකරුවකු ලෙස ඉන්දියාව සෑම විටම ශ්‍රී ලංකාවේ ප්‍රගතියට සහ සමෘද්ධියට සහය දක්වනවා” යැයි ද ඔහු වැඩිදුරටත් පැවසීය.

මෙය ටිල්වින් සිල්වා ඉන්දියාවේ නිරත වූ දෙවැනි සංචාරයයි.

ටිල්වින් සිල්වාට අමතරව, ජනතා විමුක්ති පෙරමුණේ මධ්‍යම කාරක සභා සභික චන්ද්‍රිකා අධිකාරී, පාර්ලිමේන්තු මන්ත්‍රී අබූබකර් අතම්බාවා, දිස්ත්‍රික් කාරක සභා සභික කබිලන් සුන්දරමූර්ති සහ අන්තර්ජාතික කටයුතු දෙපාර්තමේන්තුවේ සාමාජිකා කල්පනා මධුභාෂිණී යන අයද මෙම නියෝජිත පිරිසට ඇතුළත් වේ.

“මෙම සංචාරයේ අරමුණ වන්නේ BJP-JVP සබඳතා ශක්තිමත් කිරීම, සංවිධානාත්මක අත්දැකීම් හුවමාරු කර ගැනීම සහ දෙපාර්ශවයේ දේශපාලන පක්ෂ අතර සබඳතා තවදුරටත් ගැඹුරු කිරීමයි,” යනුවෙන් BJP හි විදේශ කටයුතු දෙපාර්තමේන්තුවේ භාරකාර විජේ චෞතායිවාලේ පවසා ඇත.