බාල තත්ත්වයේ ‘අලි වෙඩි’ භාවිත කිරීම ඇතුළු හේතු කිහිපයක් නිසා ශ්‍රී ලංකාවේ අලින්ගෙන් 30%කට ආසන්න ප්‍රමාණයකට ශ්‍රවණාබාධ ඇති වී තිබෙන බව කෘෂිකර්ම හා පශු සම්පත් නියෝජ්‍ය අමාත්‍ය නාමල් කරුණාරත්න පවසයි.

අලි ඇතුන්, රිළවුන්, වල් ඌරන්, ඉත්තෑවුන් සහ දඬුලේනුන්ගෙන් සිදුවන උග්‍ර මිනිස්-වනජීවී ගැටුම පිළිබඳව අදහස් දක්වමින්, වනජීවී නිලධාරීන් වෙත යතුරුපැදි ප්‍රදානය කිරීමේ උත්සවයකදී නියෝජ්‍ය අමාත්‍යවරයා මේ බව සඳහන් කළේය.

ඇතැම් ප්‍රදේශවල අලි-මිනිස් ගැටුමටත් වඩා රිළවු සහ මිනිසුන් අතර පවතින ගැටුම දැඩි වී ඇති බවත්, මෙම සමස්ත වනජීවී ගැටුම මඟින් මෙරට කෘෂිකාර්මික නිෂ්පාදනයට දැඩි බලපෑමක් එල්ල කරන බවත් ඔහු අවධාරණය කළේය.

වන සතුන් විසින් ගොවීන්ගේ වගාවන් විනාශ කිරීම හේතුවෙන් රටේ කෘෂිකාර්මික නිෂ්පාදනය විශාල අභියෝගයකට ලක්ව ඇති බවද ඔහු පැවසීය.

වෙඩි තැබීම් සහ අනෙකුත් මානව ක්‍රියාකාරකම් හේතුවෙන් අලි ඇතුන් ඇතුළු වනජීවීන්ට සිදුවන හානිය පිළිබඳවද නාමල් කරුණාරත්න පෙන්වාදුන් අතර, බොහෝ සතුන් තුවාල ලබා ශරීරයේ තුවක්කු වලින් පිටවූ ඊයම් බෝල සහිතව පසුවන බවද සඳහන් කළේය.

අලි වෙඩිවලින් නිකුත්වන අධික ශබ්දය සහිත පිපිරීම් නිසා පැටවුන් ඇතුළු අලි ඇතුන්ගේ ශ්‍රවණ පද්ධතියට හානි සිදුවන බවත්, අවසානයේ ඇතැම් අලින්ගේ ශ්‍රවණ ශක්තිය සම්පූර්ණයෙන්ම අහිමි වන බවත් ඔහු ප්‍රකාශ කළේය.

ගම්මානවල ආහාර හා ජලය පහසුවෙන් සොයාගත හැකි වීමත්, වනාන්තර තුළ ඒවායේ හිඟයක් පැවතීමත් වන සතුන් මිනිස් වාසස්ථානවලට පැමිණීමට ප්‍රධාන හේතුව බව පැවසූ නියෝජ්‍ය අමාත්‍යවරයා, මිනිස්-වනජීවී ගැටුම අවම කිරීම සඳහා වනාන්තර පරිසර පද්ධතිය තුළ සතුන්ට අවශ්‍ය තරම් ආහාර හා ජලය තහවුරු කිරීම අත්‍යවශ්‍ය බව වැඩිදුරටත් අවධාරණය කළේය.