ඩුබායි හිදී ඉකුත් ඉරිදා පැවැති කාන්තා ආසියානු කුසලාන ‘බී’ කාණ්ඩයේ ශ්‍රී ලංකාවට එරෙහි තරගයේදී මන්දගාමී ලෙස පන්දු යැවීම හේතුවෙන් බංග්ලාදේශ කණ්ඩායමට ඔවුන්ගේ තරග ගාස්තුවෙන් සියයට 5ක දඩයක් පනවා තිබේ.

නියමිත කාල සීමාවන් සලකා බැලීමෙන් පසුවද නිගාර් සුල්තානා ජෝතිගේ නායකත්වයෙන් යුතු බංග්ලාදේශ කණ්ඩායම නියමිත පන්දුවාර සංඛ්‍යාවට වඩා එක් පන්දු වාරයක් පිටුපසින් සිටින බවට තීරණය වීමෙන් අනතුරුව, එමිරේට්ස් ජාත්‍යන්තර ක්‍රිකට් පාලක මණ්ඩලයේ විනිසුරු මඬුල්ලේ ජී.එස්. ලක්ෂ්මි විසින් මෙම තහනම පනවන ලදී.

අවම පන්දු යැවීමේ වේගය පිළිබඳ වරදට අදාළ වන අයි.සී.සී. ක්‍රීඩකයන් සහ ක්‍රීඩක සහායක පිරිස් සඳහා වන විනය පද්ධතියේ 2.22 වගන්තියට අනුව, නියමිත කාලය තුළ යැවීමට අපොහොසත් වන සෑම පන්දු වාරයක් සඳහාම ක්‍රීඩකයන්ට ඔවුන්ගේ තරග ගාස්තුවෙන් සියයට පහක (5%) දඩයක් පනවනු ලැබේ.

කෙසේ වෙතත්, බංග්ලාදේශ නායක නිගාර් සුල්තානා අදාළ වරද පිළිගෙන පනවන ලද දඬුවම ද පිළිගත් බැවින් මේ සම්බන්ධයෙන් විධිමත් පරීක්ෂණයක් පැවැත්වීමට අවශ්‍යතාවක් මතු නොවීය.

තරගයේ පිටියේ විනිසුරුවන් ලෙස කටයුතු කළ වෘන්දා රාති සහ හුමෙයිරා ෆාරා, තෙවන විනිසුරු සලීමා ඉමිතියාස් සහ සිව්වන විනිසුරු රබාබ් අහ්සාන් විසින් මෙම චෝදනාව ඉදිරිපත් කර තිබුණි.