රුපියල් ට්‍රිලියන 95 ක් වන රටේ සම්පූර්ණ ණය බරින් සියයට 35 ක් විදේශීය ණය බවත් වත්මන් ආණ්ඩුව පවසන භාණ්ඩාගාරයේ පවතින අතිරික්තය භාවිතයෙන් මෙම ණය ගෙවා දමන්නේ නම් රඳවා ගෙන යා යුතු ණය සියයට 11 ක් පමණක් වනු ඇති බවත් එක්සත් ජාතික පක්ෂයේ හිටපු නියෝජ්‍ය නායක පාර්ලිමේන්තු මන්ත්‍රී රවී කරුණානායක පවසයි.

එවැනි තත්වයක් පවතින්නේ නම් මෙම සියයට 11 අගය රඳවා තබා ගත හැකි බව පැවසූ මන්ත්‍රීවරයා ආණ්ඩුව සිදු කරන ඇතැම් ප්‍රකාශ වාචිකව සිදු කළ ද ප්‍රායෝගිකව අනුගමනය කිරීමේ හැකියාවක් නොමැති බව ද පැවසුවේය.

එමෙන්ම ඔහු පෙන්වා දුන්නේ අය වැය සැකසීමේදී අය පිළිබඳව පමණක් නොව වැය පිළිබඳව ද අවධානය යොමු කළ යුතු බවයි.

රටක් සංවර්ධනය වීමට නම් වියදම් කළ යුතු බව පැවසූ මන්ත්‍රීවරයා එම වියදම් ඔස්සේ ලැබිය හැකි ආදායම වියදමට සාපේක්ෂව වැඩි අගයක් නම් රටක සාර්ථකත්වය එය බව ද ප්‍රකාශ කළේය.

ceylonwire.lk වෙබ් අඩවිය සමග පැවැති සම්මුඛ සාකච්ඡාවකට එක්වෙමින් පාර්ලිමේන්තු මන්ත්‍රී රවී කරුණානායක මෙම අදහස් පළ කළේය.