හිටපු එක්සත් ජනපද ජනාධිපති ජෝ බයිඩන් පෙළෙන පුරස්ථිති පිළිකාව ඔහුගේ අස්ථි (ඇටමිඳුළු) දක්වා සහ ඊටත් එහාට පැතිර ගොස් ඇති අතර, ඔහු දැඩි වේදනාකාරී තත්ත්වයක පසුවන බව ඔහුගේ පුත් හන්ටර් බයිඩන් ප්‍රකාශ කර තිබේ.

BBC නාලිකාවේ Newsnight වැඩසටහන සමඟ පැවැත්වුණු සම්මුඛ සාකච්ඡාවකට එක්වෙමින් හන්ටර් බයිඩන් සඳහන් කළේ සිය පියාගේ පිළිකා තත්ත්වය තවත් උග්‍ර වී ඇති බවයි.

“පිළිකාව ශරීරය පුරා පැතිර ගොස්, ඔහුගේ අස්ථි දක්වා සහ ඊටත් එහාට ව්‍යාප්ත වෙලා. එය ඉතා වේදනාකාරී වගේම පැති කිහිපයකින්ම ඔහුව දැඩි ලෙස බලපෑමට ලක්කර තිබෙනවා” යනුවෙන් හන්ටර් බයිඩන් එහිදී පවසා ඇත.

කෙසේවෙතත්, හන්ටර් බයිඩන්ගේ මෙම ප්‍රකාශය සම්බන්ධයෙන් අදහස් දැක්වීම 83 හැවිරිදි ජෝ බයිඩන්ගේ මාධ්‍ය ප්‍රකාශකවරයා විසින් ප්‍රතික්ෂේප කර තිබේ.

ධවල මාළිගාවෙන් නික්මගොස් මාස හතරකටත් අඩු කාලයකදී, එනම් 2025 මැයි මාසයේදී, තමා පුරස්ථිති පිළිකාවේ උග්‍ර තත්ත්වයකින් පෙළෙන බවත් එය අස්ථි දක්වා පැතිර ගොස් ඇති බවත් ජෝ බයිඩන් විසින් ප්‍රථම වරට අනාවරණය කරන ලදී.

ඉන්පසුව ඔක්තෝබර් මාසයේදී ඔහුගේ මාධ්‍ය ප්‍රකාශකයෙකු සඳහන් කළේ, ඔහු ඒ සඳහා විකිරණ ප්‍රතිකාර සහ හෝමෝන ප්‍රතිකාර ලබා ගනිමින් සිටින බවයි.

2020 වසරේ පැවැති ජනාධිපතිවරණය ජයග්‍රහණය කරන විට ජෝ බයිඩන් එක්සත් ජනපද ජනාධිපති ධුරයට පත් වූ වයස්ගතම පුද්ගලයා බවට පත්විය.

2021 සිට 2025 දක්වා පැවැති ඔහුගේ ධුර කාලය තුළ ඔහුගේ ශාරීරික සෞඛ්‍ය තත්ත්වය සහ මානසික කාර්යක්ෂමතාව කෙරෙහි සමාජයේ දැඩි අවධානයක් යොමුවිය.

පිළිකා තත්ත්වය හමුවේ වුවද, ජෝ බයිඩන් පසුගිය ජූනි මාසයේදී චිකාගෝ නුවර පැවැති බාරැක් ඔබාමා ජනාධිපති පුස්තකාලය විවෘත කිරීමේ උත්සවයටද සහභාගී විය.

බයිඩන් 2009 සිට 2017 දක්වා කාලය තුළ ඔබාමා පාලනය යටතේ උප ජනාධිපතිවරයා ලෙස කටයුතු කළේය.

ඔහුගේ ජනාධිපති ධුර කාලය අලලා රචිත ස්වයංචරිතාපදාන කෘතිය ලබන නොවැම්බර් 17 වන දින එළිදැක්වීමට නියමිතව ඇත.