රජය විසින් පවත්වාගෙන යනු ලබන සියයට 5 ක උද්ධමන ඉලක්කය එක්සත් ජාතික පක්ෂයේ හිටපු නියෝජ්‍ය නායක පාර්ලිමේන්තු මන්ත්‍රී රවී කරුණානායක දැඩි ලෙස විවේචනය කර තිබේ.

එමගින් ජනතාවගේ තාත්වික ආදායම ක්‍රමයෙන් ක්ෂය වන බවත් විශ්‍රාම වැටුප් ලාභීන්, වේතන ලබන සේවකයන් සහ සුළු තැන්පත්කරුවන් දැඩි ලෙස පීඩාවට පත්වන බවත් මන්ත්‍රීවරයා පැවසුවේය.

උද්ධමනය ඉදිරියේදී සාමාන්‍ය තත්ත්වයට පත්වනු ඇතැයි බලධාරීන් නිතර සහතික වූවද, මෙම පිළිවෙත හේතුවෙන් දේශීය ඉල්ලුම බලවත් ලෙස පිරිහී ඇති අතර සමස්ත ආර්ථිකය යථා තත්ත්වයට පත්වීම ප්‍රමාද වී ඇති බව ද ඔහු පෙන්වා දෙයි.

එබැවින්, වත්මන් උද්ධමන ඉලක්කය සියයට 2 ත් 3 ත් අතර අගයක් දක්වා පහත හෙළන ලෙස රජයෙන් ඉල්ලා සිටින මන්ත්‍රීවරයා, එමගින් ඉන්දියාව සහ තායිලන්තය වැනි කලාපීය ආර්ථිකයන්හි මට්ටමට ශ්‍රී ලංකාවට ද පැමිණිය හැකි බව සඳහන් කළේය.

මීට අමතරව, උද්ධමනය වෙනස් විය හැකි සීමාව තවදුරටත් පටු කිරීම, මහ බැංකුවේ වගවීම වැඩිදියුණු කිරීම සහ උද්ධමනය පාලනය කිරීමට පමණක් සීමා නොවී දීර්ඝකාලීන ආර්ථික වර්ධනය සමග සෘජුව සම්බන්ධ වූ මුදල් ප්‍රතිපත්තියක් සකස් කිරීමේ අවශ්‍යතාව ද ඔහු මෙහිදී අවධාරණය කළේය.