අලුතින් යෝජිත අල්ලස් හෝ දූෂණ විමර්ශන පනතේ සංශෝධනයට අනුව, අල්ලස් චෝදනාවලට ලක්ව සිටින සැකකරුවකු, අදාළ වරද පිළිබඳව තමන් දන්නා සියලු තොරතුරු සම්පූර්ණයෙන් සහ සත්‍ය ලෙස හෙළිදරව් කරන්නේ නම්, ඔහුට එරෙහිව චෝදනා නොකිරීමට හෝ නඩු පවරා නොසිටීමට අල්ලස් හෝ දූෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්වරයාට බලය හිමිවේ.

2023 අංක 9 දරන අල්ලස් හෝ දූෂණ විමර්ශන පනතේ මෙම සංශෝධනය, සමහර වගන්තිවල නීතිමය බලපෑම පිළිබඳ වෙනස්කම් ද සමඟින් ජනාධිපති අනුර කුමාර දිසානායකගේ නියෝගයකට අනුව ප්‍රකාශයට පත්කර ඇත.

ප්‍රධාන වගන්ති අතරින්, මහේස්ත්‍රාත් අධිකරණවල පවරා ඇති නඩු ඉවත් කර ගැනීමට අධ්‍යක්ෂ ජනරාල්වරයාට හැකිවන පරිදි පනතේ 67 වැනි වගන්තිය සංශෝධනය කිරීමට නියමිතය.

තවත් සංශෝධනයකින් යෝජනා වී ඇත්තේ, දූෂණය හේතුවෙන් ලබාගත් හෝ පරිවර්තනය කරන ලද ඕනෑම දේපළක වටිනාකම අයකර ගැනීමටත්, වරදකරු වූ දිනයේ සිට දූෂණය මගින් යම් පුද්ගලයකු ලබාගත් ඕනෑම ප්‍රදානයක්, පත්වීමක්, ප්‍රතිලාභයක් හෝ වාසියක් නීතිවිරෝධී බවට පත්කිරීමටත් ය.

මීට අමතරව, සංශෝධනයට අනුව පළාත් රාජ්‍ය සේවයේ හෝ පොලිස් බලකායේ නිලධාරීන් සහ සේවකයන් ද තාවකාලිකව හෝ ස්ථිරව කොමිෂන් සභාවට පත්කර ගත හැකිය.