අර්ජන්ටිනා සුපිරි පාපන්දු ක්‍රීඩක ලියොනෙල් මෙසීගේ පියා මෙන්ම ඔහුගේ දීර්ඝකාලීන නියෝජිතයා වූ ජෝර්ජ් මෙසී දීර්ඝ කාලයක් පැවති අසනීප තත්ත්වයකින් පසු වයස අවුරුදු 68 දී අභාවප්‍රාප්ත වූ බව විදෙස් මාධ්‍ය වාර්තා සඳහන් කරයි.

ජෝර්ජ් හොරාසියෝ මෙසී මෙලෙස අභාවප්‍රාප්ත වී ඇත්තේ අර්ජන්ටිනාවේ රොසාරියෝ හි පිහිටි රෝහලක ප්‍රතිකාර ලබමින් සිටියදීය.

ඔහුගේ සෞඛ්‍ය තත්ත්වය පිළිබඳව පසුගිය මාස කිහිපය පුරාම දැඩි අවධානයක් යොමුව තිබිණි.

පසුගිය ජූනි මාසයේදී ලියොනෙල් මෙසී ෆීෆා ලෝක කුසලාන තරගාවලියට ක්‍රීඩා කරමින් සිටියදී, ජෝර්ජ් රෝගී තත්ත්වයක් සඳහා වෛද්‍ය ප්‍රතිකාර ලබමින් සිටින බව මෙසීගේ පවුලේ අය තහවුරු කළ අතර, ඔහුගේ තත්ත්වය පිළිබඳව කෙරෙන වාර්තා හමුවේ ජනමාධ්‍ය වෙතින් පෞද්ගලිකත්වය සහ ‘මානුෂීයභාවය’ ඉල්ලා සිටියහ.

මෙසීගේ අසමසම පාපන්දු වෘත්තීය ජීවිතය පුරාම ප්‍රධාන භූමිකාවක් ඉටු කළ ජෝර්ජ්, වසර ගණනාවක් පුරා ඔහුගේ නියෝජිතයා ලෙස කටයුතු කරමින් ඔහුගේ පිටියෙන් පිටත කටයුතු සහ අනෙකුත් වැඩසටහන් රැසක් මෙහෙයවීය.

මියයන විට ජෝර්ජ් සිය බිරිඳ වන සෙලියා කුචිටිනි සහ ඔවුන්ගේ දරුවන් සිව්දෙනා වන ලියොනෙල්, රොඩ්රිගෝ, මතියාස් සහ මරියා සොල් වෙනුවෙන් සිය ආදරණීය මතකයන් ඉතිරි කර ගොස් ඇත.