පූර්ව බුද්ධි තොරතුරු ලැබී තිබියදීත් 2019 පාස්කු ඉරිදා ත්‍රස්ත ප්‍රහාරය වළක්වා ගැනීමට කටයුතු නොකිරීමේ චෝදනාවට මරණ දඬුවම නියම වීමට පෙර, හිටපු ආරක්ෂක ලේකම් හේමසිරි ප්‍රනාන්දු සහ හිටපු පොලිස්පති පූජිත් ජයසුන්දර යන දෙදෙනා කොළඹ ත්‍රිපුද්ගල මහාධිකරණ විනිසුරු මඬුල්ල හමුවේ ප්‍රකාශ ලබාදෙන ලදී.

පොලිස්පතිවරයා ලෙස ජාතික ආරක්ෂාව පිළිබඳ වගකීම තමන් සතුව තිබූ බව පිළිගත් පූජිත් ජයසුන්දර, තමන් කිසිදු දිනක සිතාමතා කිසිවෙකුගේ මරණයකට වගකිව යුතු නැති බව අධිකරණයට පැවසීය. මෙම සිදුවීමට සම්බන්ධ අනෙකුත් නිලධාරීන් නිදහස් කර ඇති බවත්, ප්‍රහාරයෙන් පසුව තමන් දිගින් දිගටම විවිධ බලපෑම්වලට සහ නීතිමය ක්‍රියාමාර්ගවලට මුහුණදුන් බවත් ඔහු සඳහන් කළේය.

“මම කිසි විටෙකත් කිසිවෙකුට අනර්ථයක් හෝ හානියක් සිදුවන අන්දමින් සිතාමතා මගේ රාජකාරිය ඉටුකර නැහැ” යනුවෙන් පැවසූ ඔහු අධිකරණයෙන් අනුකම්පාව ඉල්ලා සිටියේය.

තමන්ට එරෙහිව ඉදිරිපත්ව ඇති නිගමන ප්‍රතික්ෂේප කළ හිටපු ආරක්ෂක ලේකම් හේමසිරි ප්‍රනාන්දු තර්ක කළේ, ආරක්ෂක අමාත්‍යාංශයේ ලේකම්වරයා ලෙස තමන්ට ස්වාධීන මෙහෙයුම් බලතල නොතිබූ බවයි. ප්‍රහාරය සිදුවන අවස්ථාවේ වැඩබලන අමාත්‍යවරයෙකු පවා පත්නොකර විදේශගතව සිටි හිටපු ජනාධිපති සහ ආරක්ෂක අමාත්‍ය මෛත්‍රීපාල සිරිසේනගේ අධිකාරිය යටතේ තමන් කටයුතු කළ බව ඔහු පැවසීය.

හිටපු රාජ්‍ය බුද්ධි සේවා අධ්‍යක්ෂ නිලන්ත ජයවර්ධන ජනාධිපතිවරයා සමඟ සමීපව කටයුතු කළ අතර, බුද්ධි තොරතුරු සම්බන්ධයෙන් සෘජුවම ජනාධිපතිවරයා දැනුවත් කරන ලෙස ඔහුට උපදෙස් දී තිබූ බවද හේමසිරි ප්‍රනාන්දු ප්‍රකාශ කළේය. ප්‍රහාරයට පෙර දින නිලන්ත ජයවර්ධනගෙන් තමන්ට ලැබුණේ වට්ස්ඇප් පණිවිඩ දෙකක් පමණක් බවත්, ලිඛිත බුද්ධි වාර්තාවක් ලබා නුදුන් බවත් ඔහු අධිකරණයට පැවසීය.

තවද, බුද්ධි සමාලෝචන රැස්වීමකදී ඉදිරිපත් වූ ප්‍රහාරයක් පිළිබඳ තොරතුරු දැක්වීමට නිලන්ත ජයවර්ධන අපොහොසත් වූ බවත්, අවස්ථා කිහිපයකදීම අදාළ තොරතුරු සඟවා තබාගත් බවත් හේමසිරි ප්‍රනාන්දු වැඩිදුරටත් චෝදනා කළේය.

හමුදාව කැඳවීමට හෝ ඇඳිරි නීතිය පැනවීමට තමන්ට බලයක් නොතිබූ බවත්, ජනාධිපති පරීක්ෂණ කමිටුවක් මගින් නම්කරන ලද අනෙකුත් නිලධාරීන්ට එරෙහිව නඩු පවරා නොමැති බවත් ඔහු තර්ක කළේය. මෙම තීන්දුව සම්බන්ධයෙන් පුද්ගලයන් දෙදෙනෙකු සතුටු වන බව පැවසූ හේමසිරි ප්‍රනාන්දු, ඒ හිටපු ජනාධිපති මෛත්‍රීපාල සිරිසේන සහ නිලන්ත ජයවර්ධන බව සඳහන් කළේය.

තමන් 76 හැවිරිදි වියේ පසුවන බැවින් සහ මෑතකදී ශල්‍යකර්මයකට භාජනය වූ බැවින් සිරගතව සිටින කාලය තුළ නොකඩවා වෛද්‍ය ප්‍රතිකාර ලබාදෙන ලෙසද ඔහු ඉල්ලා සිටියේය.

“ඉතිහාසය දිනෙක මාව නිදොස් කොට නිදහස් කරාවි,” යනුවෙන් හේමසිරි ප්‍රනාන්දු අධිකරණය හමුවේ පැවසීය.

ත්‍රිපුද්ගල විනිසුරු මඬුල්ලේ බහුතර විනිසුරුවරුන්ගේ තීරණය වූයේ හේමසිරි ප්‍රනාන්දු සහ පූජිත් ජයසුන්දර යන දෙදෙනාට එරෙහිව ගොනුකර තිබූ චෝදනා 855න් චෝදනා 854කටම ඔවුන් වරදකරුවන් බවයි.

කෙසේවෙතත්, සුළුතර විනිසුරුවරයාගේ මතය වූයේ පැමිණිල්ල විසින් චෝදනා සාධාරණ සැකයකින් තොරව ඔප්පු කර නොමැති බැවින් ඔවුන් නිදහස් කළ යුතු බවයි.