July 25, 2026
ජාතික ජන බලවේගයේ පාර්ලිමේන්තු මන්ත්රී අසිත නිරෝෂණ විසින් ශ්රී ලංකා නීතිඥ සංගමයේ සභාපති රජීව් අමරසූරිය සම්බන්ධයෙන් පාර්ලිමේන්තුවේදී කරන ලද චෝදනා “සම්පූර්ණයෙන්ම අසත්ය, පදනම් විරහිත සහ ද්වේෂසහගත චේතනාවෙන්” කරන ලද ඒවා බව පවසමින් ශ්රී ලංකා නීතිඥ සංගමය එම චෝදනා තදින්ම ප්රතික්ෂේප කර ඇත.
සිකුරාදා පැවැති පාර්ලිමේන්තු විවාදයේදී අදහස් දක්වමින් කොළඹ දිස්ත්රික් මන්ත්රීවරයා චෝදනා කළේ පසුගිය බ්රහස්පතින්දා රජිව් අමරසූරිය විපක්ෂ නායක සජිත් ප්රේමදාස හමුවී සාකච්ඡා පවත්වා ඇති බවයි.
රජිව් අමරසූරියගේ සහාය ලබාගැනීම වෙනුවෙන් ඉදිරියේදී පැවැත්වීමට නියමිත පළාත් සභා මැතිවරණයේදී බස්නාහිර පළාතේ ප්රධාන අමාත්ය අපේක්ෂකත්වය ලබාදීමට සජිත් ප්රේමදාස පොරොන්දු වී ඇති බවට ද මන්ත්රී නිරෝෂණ වැඩිදුරටත් චෝදනා කළේය.
ඉන් අනතුරුව නිවේදනයක් නිකුත් කරමින් ඊට ප්රතිචාර දැක්වූ ශ්රී ලංකා නීතිඥ සංගමය, මෙම චෝදනා සම්බන්ධයෙන් සිය “තදබල කණගාටුව” පළකර සිටි අතර, මහජනතාව නොමඟ යැවීමේ අරමුණින් පදනම් විරහිත සහ අපහාසාත්මක ප්රකාශ කිරීමට මන්ත්රීවරයා පාර්ලිමේන්තු වරප්රසාද අවභාවිත කර ඇති බවට ද චෝදනා කළේය.
දේශපාලන ප්රහාර මගින් තම සංවිධානය අඩපණ කළ නොහැකි බව පැවසූ නීතිඥ සංගමය, ශ්රී ලංකාවේ නීතිඥ ප්රජාව එහි ස්වාධීනත්වය සහ අභිමානය ආරක්ෂා කිරීම සඳහා එක්ව සිටින බව අවධාරණය කළේය.
එසේම, ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාම යෑමේ වයස දීර්ඝ කිරීමේ යෝජනා සම්බන්ධයෙන් ද සිය ස්ථාවරය නැවත අවධාරණය කළ සංගමය, ශ්රේෂ්ඨාධිකරණවලට බලපාන ආණ්ඩුක්රම ව්යවස්ථා සංශෝධන තාවකාලික තත්ත්වයන්ට ප්රතිචාර වශයෙන් හෝ තදබදකාරී ලෙස හඳුන්වානොදිය යුතු බව පැවසීය.
බලයේ සිටින්නේ කවර ආණ්ඩුවක් වුවද, ප්රජාතන්ත්රවාදය, අධිකරණ ස්වාධීනත්වය සහ මානව හිමිකම් වෙනුවෙන් තමන් සදාකාලිකවම පෙනීසිටි බව සඳහන් කළ නීතිඥ සංගමය, තම සංගමය “දේශපාලනය නොකරන බවත්, කිසිදා නොකරන බවත්” වැඩිදුරටත් සඳහන් කළේය.
එසේම, පාර්ලිමේන්තු වරප්රසාදවලට මුවානොවී පාර්ලිමේන්තුවෙන් පිටතදී මෙම චෝදනා නැවත නගන ලෙසට මන්ත්රී අසිත නිරෝෂණට සෘජුවම අභියෝග කළ නීතිඥ සංගමය, එමගින් “සුදුසු නෛතික පියවර” ගැනීමට මගපෑදෙනු ඇති බවද පැවසීය.
