කඩදාසි, ප්ලාස්ටික් ඇතුළු ඉවතලන ද්‍රව්‍ය නැවත භාවිතයට ගත හැකි අලංකාර විලාසිතා බවට පත් කරමින්, ශ්‍රී ලංකාවේ ප්‍රථම තිරසාර විලාසිතා දැක්ම පවත්වා ඓතිහාසික වාර්තාවක් තැබීමට පේරාදෙණිය විශ්වවිද්‍යාලයේ සිසුන් සමත්ව තිබේ.

පේරාදෙණිය විශ්වවිද්‍යාලීය ‘ZeroPlastic’ සංගමය විසින් සංවිධානය කරන ලද මෙම ‘AURORA 2026’ විලාසිතා දැක්ම මහනුවර KCC පරිශ්‍රයේදී උත්කර්ෂවත් අන්දමින් පැවැත්විණි.

එහිදී ප්‍රතිචක්‍රීකරණය කරන ලද සහ ප්‍රතිනිර්මාණය කරන ලද ද්‍රව්‍ය භාවිතයෙන් පරිසර හිතකාමී ලෙස නිපදවන ලද සුවිශේෂී විලාසිතා රැසක් වේදිකාවට රැගෙන ඒමට සිසුන් කටයුතු කළහ.

වත්මන් විලාසිතා ලෝකයේ පවතින “භාවිත කොට ඉවතලීමේ” මානසිකත්වයට අභියෝග කළ මෙම සුවිශේෂී වැඩසටහන හරහා, පරිසර සංරක්ෂණය සහ තිරසාර පැවැත්ම උදෙසා තරුණ පරපුර පෙරමුණ ගන්නා ආකාරය මැනවින් පෙන්නුම් කෙරිණි.

මෙහි ප්‍රධාන අනුග්‍රාහකයා ලෙස MAS හෝල්ඩින්ග්ස් (MAS Holdings) ආයතනයට අනුබද්ධ MAS Linea Clothing ආයතනය කටයුතු කළ අතර, ශ්‍රී ලංකා රෙදිපිළි හා ඇඟලුම් ආයතනය වෙතින් ද මේ සඳහා පූර්ණ සහයෝගය හිමිවිය.

පේරාදෙණිය විශ්වවිද්‍යාලයේ විවිධ පීඨ නියෝජනය කරන සිසුන් පිරිසක් එක්ව මෙම ප්‍රසංගයේ සැලසුම්කරණය, නිෂ්පාදනය, සැපයුම් කළමනාකරණය, නිර්මාණාත්මක අධ්‍යක්ෂණය මෙන්ම තාක්ෂණික මෙහෙයුම් ද ඉතා සාර්ථකව සම්බන්ධීකරණය කර තිබීම විශේෂත්වයකි.

සාමාන්‍ය ශිෂ්‍ය ව්‍යාපෘතියක සීමාවන්ගෙන් ඔබ්බට ගිය ඉහළ ප්‍රමිතියකින් යුත් විලාසිතා දැක්මක් ගෙන ඒම සඳහා නිර්මාණකරුවන්, නිරූපිකාවන්, සංවිධායකයින්, ස්වේච්ඡා සේවකයින් මෙන්ම තාක්ෂණික කණ්ඩායම් එක්ව කැපවීමෙන් කටයුතු කර තිබිණි. මෙම සාර්ථකත්වය හරහා, සමාජීය වගකීමක් මෙන්ම ඉහළ කුසලතාවලින් සන්නද්ධ උපාධිධාරීන් බිහිකරන ශ්‍රී ලංකාවේ ප්‍රමුඛතම අධ්‍යාපන ආයතනයක් ලෙස පේරාදෙණිය විශ්වවිද්‍යාලය සතු කීර්තිනාමය නැවත වරක් මැනවින් සනාථ වී තිබේ.