හිටපු නාවික හමුදාපති, ෆ්ලීට් අද්මිරාල් වසන්ත කරන්නාගොඩ අල්ලස් හෝ දූෂණ චෝදනා විමර්ශන කොමිෂන් සභාව විසින් අද දින අත්අඩංගුවට ගෙන තිබේ.

යෝෂිත රාජපක්ෂව විධායක නිලධාරියකු ලෙස ශ්‍රී ලංකා නාවික හමුදාවට බඳවාගැනීම සහ ඉන් අනතුරුව බ්‍රිතාන්‍යයේ බ්‍රිටැනියා රාජකීය නාවික විද්‍යාලයෙන් (Britannia Royal Naval College) ඔහු ලැබූ පුහුණුව සම්බන්ධයෙන් කෙරෙන විමර්ශනයකට අදාළව කරන්නාගොඩ මහතාට මීට පෙරද අල්ලස් කොමිසම හමුවේ පෙනී සිටින ලෙස දන්වා කැඳවීම් කර තිබිණි.

කෙසේවෙතත්, පෙර අවස්ථාවකදී තමා අසනීප තත්ත්වයෙන් පසුවන බව පවසමින් ඔහු කොමිසම හමුවේ පෙනීසිටියේ නැත.

මෙම සිදුවීමට අදාළව යෝෂිත රාජපක්ෂද පසුගිය මාසයේදී අත්අඩංගුවට ගෙන පසුව ඇප මත මුදාහැරිණි.

වසන්ත කරන්නාගොඩගේ අද දින සිදුකළ මෙම අත්අඩංගුවට ගැනීම එම විමර්ශනයටම සම්බන්ධ එකක්ද යන්න පිළිබඳව අල්ලස් හෝ දූෂණ චෝදනා විමර්ශන කොමිෂන් සභාව මෙතෙක් නිල වශයෙන් තහවුරු කර නොමැත.