June 26, 2026
ශ්රී ලංකාව තුළ බුද්ධ ශාසනය සුරැකීම සඳහා කඩිනම් ප්රතිසංස්කරණ සිදුකළ යුතු බව හිටපු ජනාධිපතිනි චන්ද්රිකා බණ්ඩාරනායක කුමාරතුංග ප්රකාශ කර සිටියි.
මහාසංඝරත්නය සම්බන්ධයෙන් වරින් වර එල්ල වන විවිධ විනය විරෝධී චෝදනා හේතුවෙන්, විශේෂයෙන්ම තරුණ පරපුර අතර ආගම කෙරෙහි පවතින මහජන විශ්වාසය පළුදු වෙමින් පවතින බවට ද ඇය අනතුරු අඟවන්නීය.
විශේෂ වීඩියෝ ප්රකාශයක් නිකුත් කරමින් කුමාරතුංග පවසන්නේ, මෑතකදී බෞද්ධ භික්ෂූන් වහන්සේලා සම්බන්ධයෙන් වාර්තා වූ ඇතැම් සිදුවීම් පිළිබඳව රටට ආදරය කරන බොහෝ පිරිසක් දැඩි කනස්සල්ලට පත්ව සිටින බවයි.
මත්ද්රව්යවලට අදාළ වැරදි සම්බන්ධයෙන් භික්ෂූන් වහන්සේලා අත්අඩංගුවට පත්වීමේ වාර්තා සහ ප්රමුඛ පෙළේ බෞද්ධ විහාරස්ථාන අටක විහාරාධිපති හිමි නමක විසින් වසර දෙකක කාලයක් තිස්සේ තරුණ දැරියක ලිංගික අපයෝජනයට ලක් කළ බවට එල්ල වී ඇති චෝදනා පිළිබඳව ඇය එහිදී සඳහන් කරයි.
මෙවැනි සිදුවීම් හේතුවෙන් බොහෝ බෞද්ධයන්ගේ විශ්වාසය සලිත වී ඇති බවත්, ආගමික ආයතන කෙරෙහි පවතින විශ්වාසය ගිලිහී යාම සමාජයට, විශේෂයෙන්ම තරුණ පරපුරට බරපතල ප්රතිවිපාක ගෙන දිය හැකි බවත් ඇය අනතුරු අඟවයි.
එමෙන්ම, මෙම ගැටලුවේ පවතින බරපතලකම හමුවේ වුවද, දේශපාලන නායකයන් මේ පිළිබඳව බොහෝ දුරට නිශ්ශබ්දතාවයක් රැකීම සම්බන්ධයෙන් ද හිටපු ජනාධිපතිනිය සිය කනස්සල්ල පළකරයි.
ප්රතිසංස්කරණ හඳුන්වා දීම සඳහා මහාසංඝරත්නය පෙරමුණ ගන්නා ලෙස ඉල්ලමින් තමන් මහා නායක හිමිවරුන් වෙත ලිඛිතව දැනුම් දුන් බව ඇය පවසයි.
එම යෝජනාවට යහපත් ප්රතිචාර ලැබුණු බව සඳහන් කරන හිටපු ජනාධිපතිනිය, මෙම ප්රතිසංස්කරණ නිර්දේශ කිරීම සඳහා ජ්යෙෂ්ඨ භික්ෂූන් වහන්සේලා, සිවිල් සමාජ නියෝජිතයන් සහ අනෙකුත් ආගමික නායකයන්ගෙන් සමන්විත කමිටුවක් පත්කරන ලෙස යෝජනා කරයි.
යෝජිත නිර්දේශ ක්රියාත්මක කිරීම සඳහා අවශ්ය නීතිමය රාමුව සකස් කරන ලෙස හිටපු ජනාධිපතිනිය රජයෙන් ඉල්ලා සිටි අතර, බුද්ධ ශාසනය ආරක්ෂා කිරීමට සහ මහජන විශ්වාසය නැවත ගොඩනැඟීමට වඩාත් ශක්තිමත් යාන්ත්රණයක් අවශ්ය බව ඇය පෙන්වාදෙයි.
වැරදි ක්රියාවලට එරෙහිව මහජනතාව නිශ්ශබ්දව නොසිටිය යුතු බව අවධාරණය කළ ඇය, ආගමික ආයතන සුරැකීම නායකයන්ගේ මෙන්ම පුරවැසියන්ගේ ද හවුල් වගකීමක් බව ප්රකාශ කරයි.
