සිදුකරන ලද නිල පරීක්ෂණවලින් අනතුරුව, වවුනියාව මහනගර සභාවේ නගරාධිපතිවරයා සහ චාවකච්චේරි නගර සභාවේ උප සභාපතිවරයා වහාම ක්‍රියාත්මක වන පරිදි ධුරවලින් ඉවත් කිරීමට උතුරු පළාත් ආණ්ඩුකාර නාගලිංගම් වේදනායගම් නියෝග කර තිබේ.

1947 අංක 29 දරන මහා නගර සභා ආඥා පනත සහ 1939 අංක 61 දරන නගර සභා ආඥා පනත, 1989 අංක 12 දරන පළාත් සභා (අනුශංගික විධිවිධාන) පනත සමඟ කියවිය යුතු ප්‍රතිපාදන ප්‍රකාරව නිකුත් කරන ලද අතිවිශේෂ ගැසට් නිවේදන මඟින් ආණ්ඩුකාරවරයා මේ බව ප්‍රකාශ කර ඇත.

පුද්ගල පරීක්ෂණ මණ්ඩලයක් විසින් ඉදිරිපත් කරන ලද වාර්තා සමාලෝචනය කිරීමෙන් අනතුරුව මෙම තීරණය ගත් බව එහි සඳහන් වේ.

අදාළ පළාත් පාලන ආයතන දෙකෙහි ක්‍රියාකාරිත්වය පිළිබඳව විමර්ශනය කර වාර්තා ඉදිරිපත් කිරීම සඳහා කොමසාරිස්වරයා ලෙස විශ්‍රාමික දිස්ත්‍රික් විනිසුරු කන්දයියා ආරියනායගම් මහතා පත් කර තිබූ බව ද ආණ්ඩුකාරවරයා පවසයි.

එම විමර්ශන වාර්තා පදනම් කර ගනිමින්, වවුනියාව මහනගර සභාවේ නගරාධිපති සුන්දරලිංගම් කන්දීපන්, මහා නගර සභා ආඥා පනතේ ප්‍රතිපාදන යටතේ තවදුරටත් ධුරය දැරීමට සුදුසුකම් නොලබන බවට තමන් සෑහීමකට පත්වූ බව උතුරු පළාත් ආණ්ඩුකාරවරයා සඳහන් කර තිබේ.

තවත් නිවේදනයක් මඟින් ආණ්ඩුකාරවරයා පෙන්වා දෙන්නේ, චාවකච්චේරි නගර සභාවේ උප සභාපති ජී. කිෂෝර් ද නගර සභා ආඥා පනතේ අදාළ ප්‍රතිපාදන යටතේ ධුරය දැරීමට නුසුදුස්සෙකු වී ඇති බවයි.

ඒ අනුව, මෙම නිලධාරීන් දෙදෙනාම 2026 ජූනි 24 වැනිදා සිට ක්‍රියාත්මක වන පරිදි ඔවුන්ගේ තනතුරුවලින් මෙන්ම සභා සාමාජිකත්වයෙන් ද ඉවත් කර ඇත.

විමර්ශන වාර්තාවල සොයාගැනීම් දීර්ඝ වශයෙන් පරික්ෂා කිරීමෙන් අනතුරුව, පළාත් සභා සහ පළාත් පාලන නීති මඟින් ආණ්ඩුකාරවරයා වෙත පැවරී ඇති ව්‍යවස්ථාපිත බලතල ප්‍රකාරව මෙම තීරණ ගෙන තිබේ.