June 16, 2026
දකුණු කොරියාවට එරෙහිව පැවැත්වීමට නියමිතව තිබූ ආසියානු රග්බි ශූරතා තරගය සඳහා සහභාගී වීමට ජාතික කණ්ඩායමට වීසා ලබාගැනීමට නොහැකි වීම සහ ඒ හේතුවෙන් පසුගිය සතියේ එම තරගය අවලංගු කිරීමට සිදුවීම සම්බන්ධයෙන් ශ්රී ලංකා රග්බි සම්මේලනයට එරෙහිව විනය පියවර ගන්නා බව ක්රීඩා අමාත්ය සුනිල් කුමාර ගමගේ ප්රකාශ කරයි.
ජනමාධ්යවේදීන් අමතමින් අමාත්යවරයා අවධාරණය කළේ, වීසා සහ ගුවන් ප්රවේශපත්ර ලබා ගැනීමේ සම්පූර්ණ වගකීම පැවරෙන්නේ අදාළ ක්රීඩා සම්මේලනයට මිස අමාත්යාංශයට නොවන බවයි.
ක්රීඩා සම්මේලනවලට වීසා ඉල්ලුම් කිරීම සඳහා අවසාන මොහොත වන තෙක් බලා සිටිය නොහැකි බව පෙන්වාදුන් අමාත්යවරයා, මෙම සිදුවීම පැහැදිලිවම නොසැලකිලිමත්කම නිසා සිදු වූවක් බව හැඳින්වීය.
“ක්රීඩා අමාත්යාංශය වීසා හෝ ප්රවේශපත්ර ක්රියාවලීන් සඳහා මැදිහත් වෙන්නේ නැහැ. ප්රතිපාදන ලබාදෙනවා නම් අපි වියදම් පියවනවා, නමුත් කණ්ඩායම් තේරීම සහ වීසා කටයුතු සූදානම් කිරීම සම්පූර්ණයෙන්ම සම්මේලනයේ වගකීමක්. කණ්ඩායමට බදාදා යන්න තියෙනවා නම්, සම්මේලනයට බැහැ සඳුදා වෙලා වීසා ඉල්ලන්න. මේක සම්මේලනයේ නොසැලකිල්ල. මේක රජයේ ප්රශ්නයක් නෙවෙයි, මේක සම්මේලනයේ හෝ සංගමයේ ප්රශ්නයක්. අපි මීට පෙරත් කරලා තියෙනවා වගේම මේ සම්බන්ධයෙනුත් විනය පියවර ගන්නවා” යැයි අමාත්යවරයා පැවසීය.
මෙවැනි අතපසුවීම් දිගටම කරගෙන යෑමට ඉඩදිය නොහැකි බව වැඩිදුරටත් පැවසූ අමාත්යවරයා, මෙවැනි අසාර්ථක වීම් සිදු වූ විට සම්මේලන බොහෝ විට එහි වැරැද්ද අමාත්යාංශය පිට පැටවීමට උත්සාහ කරන බවද සඳහන් කළේය.
තරගය අවලංගු වීම සම්බන්ධයෙන් රග්බි සම්මේලනය වගකිව යුතු බවත්, මෙම සිදුවීම පාර්ලිමේන්තුවේ පවා අවධානයට ලක්ව ඇති බවත් ඔහු අවධාරණය කළේය.
