ඉන්දීය අග්‍රාමාත්‍ය නරේන්ද්‍ර මෝදි මහතා ස්ලෝවැකියාවේ නිල සංචාරයක නිරත වන අතර, එය 1993 වසරේදී එම මධ්‍යම යුරෝපීය රට නිදහස ලැබීමෙන් පසු ඉන්දීය නායකයෙකු එහි සිදුකළ පළමු සංචාරය ලෙස ඉතිහාසයට එක්වේ.

මෙම සංචාරය අතරතුර, අග්‍රාමාත්‍ය මෝදි ස්ලෝවැකියානු අග්‍රාමාත්‍යවරයා වන රොබට් ෆිකෝට ඉන්දියාවේ සංචාරය කරන ලෙස ආරාධනා කළ අතර, ඔහු එම ආරාධනය ප්‍රසිද්ධියේම පිළිගැනීම පිළිබඳව තමන් බෙහෙවින් සතුටට පත්වන බව ද සඳහන් කළේය.

දෙරට අතර ද්විපාර්ශ්වික සබඳතා තවදුරටත් ශක්තිමත් කර ගැනීම සහ එම සබඳතා ‘පුළුල් හවුල්කාරිත්වයක්’ දක්වා ඉහළ නැංවීම අරමුණු කරගනිමින් නායකයන් දෙපළ සඳුදා දින සාකච්ඡා පැවැත්වූ බව ඒ.එන්.අයි (ANI) පුවත් සේවය වාර්තා කරයි.

ස්ලෝවැකියාවේ බ්‍රැටිස්ලාවා (Bratislava) නුවරදී අග්‍රාමාත්‍ය ෆිකෝ සමඟ ඒකාබද්ධ මාධ්‍ය ප්‍රකාශයක් සිදුකරමින් අග්‍රාමාත්‍ය මෝදි මෙසේ පැවසීය:

“අද දින එතුමා හමුවීමට සහ අපගේ සබඳතාවල ඓතිහාසික මොහොතකට සාක්ෂිකරුවෙකු වීමට අවස්ථාව ලැබීම ගැන මම සතුටු වෙනවා. මෙම සංචාරය ඉන්දීය අග්‍රාමාත්‍යවරයෙකු ස්ලෝවැකියාවේ සිදුකළ පළමු සංචාරයයි. මෙම ඓතිහාසික අවස්ථාවේදී අපගේ සබඳතා ‘පුළුල් හවුල්කාරිත්වයක්’ දක්වා ඉහළ නැංවීමට අප තීරණය කිරීම පිළිබඳව මම බෙහෙවින් සතුටට පත් වෙනවා.”

මෙම පියවරත් සමඟ ඉදිරියේදී දෙරට අතර ආර්ථික, දේශපාලනික සහ තාක්ෂණික සහයෝගීතාව නව මාවතකට අවතීර්ණ වනු ඇතැයි අපේක්ෂා කෙරේ.