රථවාහන දඩ මුදල් සම්බන්ධයෙන් සමාජ මාධ්‍ය ඔස්සේ සංසරණය වන අසත්‍ය තොරතුරු පිළිබඳව ශ්‍රී ලංකා පොලිසිය අද(15) දින නිවේදනයක් නිකුත් කරමින් මහජනතාවට අනතුරු ඇඟවීමක් කර තිබේ.

වෙනත් පාර්ශවයක් විසින් සකස් කරන ලදැයි පැවසෙන, වැරදි දඩ මුදල් ඇතුළත් නිවේදනයක් අන්තර්ජාලය ඔස්සේ බහුලව හුවමාරු වී ඇති බව පොලිසිය පවසයි.

එම සංඛ්‍යාලේඛන පදනම් විරහිත සහ නොමඟ යවන සුළු ඒවා බව එම නිවේදනයේ අවධාරණය කර ඇත.

මහජනතාව නිවැරදිව දැනුවත් කිරීම සහතික කිරීම සඳහා පොලිසිය විසින් මෙම පැහැදිලි කිරීමට සමගාමීව නිවැරදි නිවේදනය ද ප්‍රසිද්ධියට පත් කර තිබේ.

තොරතුරු ලබාගැනීමේදී තහවුරු කරන ලද සහ විශ්වාසවන්ත මූලාශ්‍ර මත පමණක් විශ්වාසය තබන ලෙස ශ්‍රී ලංකා පොලිසිය පුරවැසියන්ගෙන් ඉල්ලා සිටියි.