මාරවිල, තොඩුවාව මුහුදුබඩ මාර්ගයේ පිහිටි දේවස්ථානයක් අසල ඊයේ (ඉරිදා) දින භීතිකාභූත පෝස්ටරයක් ප්‍රදර්ශනය කර තිබීම හේතුවෙන් ප්‍රදේශ කිහිපයක ආරක්ෂාව තර කරමින් වහාම ක්‍රියාත්මක වන පරිදි විශේෂ පරීක්ෂණයක් ආරම්භ කිරීමට පොලිසිය පියවර ගෙන තිබේ.

එම පෝස්ටරයේ “අද රාත්‍රියේ කුමක් සිදුවේද? මහා විපතක් බලාපොරොත්තු වන්න” සහ “ඛේදවාචකයක් බලාපොරොත්තු වන්න” වැනි දැඩි කනස්සල්ලක් සහ බියක් ඇති කරන වැකි සඳහන් කර තිබීම හේතුවෙන්, ඇති විය හැකි ආරක්ෂක අවදානමක් පිළිබඳව ප්‍රදේශවාසීන් විසින් වහාම බලධාරීන් දැනුවත් කර ඇත.

පවතින ආරක්ෂක තත්ත්වය සහ සංවේදී ස්ථානයක් අසල මෙය ප්‍රදර්ශනය කර තිබීම සැලකිල්ලට ගනිමින්, එහි කිසියම් විශ්වාසනීය තර්ජනයක් පවතින්නේ දැයි සෙවීමට පොලිසිය පුළුල් විමර්ශනයක් දියත් කරන ලදී.

ප්‍රදේශය පුරා සිදුකළ දීර්ඝ විමර්ශනවලින් අනතුරුව, අදාළ පෝස්ටරය පිටුපස කිසිදු ආරක්ෂක අවදානමක් නොමැති බව තහවුරු කර ගැනීමට පොලිස් නිලධාරීන්ට හැකි වී තිබේ.

පොලිසිය සිදු කළ වැඩිදුර ප්‍රශ්න කිරීම්වලදී හෙළි වී ඇත්තේ, එම ප්‍රදේශයේ තරුණ පිරිසක් විසින් සංවිධානය කරන ලද ‘හොල්මන් මන්දිරයක්” සඳහා සෙනඟ ආකර්ෂණය කර ගැනීමේ අරමුණින්, මෙවැනි නාට්‍යමය ස්වරූපයේ වැකි යොදාගනිමින් මෙම පෝස්ටරය අලවා ඇති බවයි.

මෙම විමර්ශනවලදී තවදුරටත් අනාවරණය වී ඇත්තේ ඊයේ (ඉරිදා) දිනයේදී අදාළ තොඩුවාව දේවස්ථානයේ වාර්ෂික මංගල්‍යය ද පවත්වා ඇති බවයි.

ප්‍රදේශ කිහිපයක් ඉලක්ක කර ගනිමින් එල්ල විය හැකි තර්ජනයක් පිළිබඳව තහවුරු නොකළ බුද්ධි තොරතුරු කිහිපයක් සම්බන්ධයෙන් ජ්‍යෙෂ්ඨ පොලිස් නිලධාරීන් මීට පෙර දැනුවත් කර තිබීම ද, මෙම සිද්ධිය හමුවේ ආරක්ෂක අංශවල දැඩි අවධානය සහ සෙදසුම් සහගත බව ඉහළ නැංවීමට හේතු වී තිබිණි.

කෙසේවෙතත්, සිදු කළ සියලු විමර්ශනවලින් පසුව මහජන ආරක්ෂාවට කිසිදු ආකාරයක තර්ජනයක් නොමැති බව පොලිසිය නිල වශයෙන් තහවුරු කර සිටියි.