භාණ්ඩාගාරයට අයත් ඇමෙරිකානු ඩොලර් මිලියන 2.5ක මුදලක් අතුරුදහන් වීම සම්බන්ධයෙන් මුදල් අමාත්‍යාංශය විසින් රජයේ මුදල් පිළිබඳ කාරක සභාවට ඉදිරිපත් කරන ලද වාර්තාවට ලබන සතියේදී ප්‍රතිචාර දැක්වීමට ශ්‍රී ලංකා මහ බැංකුව සූදානම් වෙයි.

මෙම අරමුදල් අතුරුදහන් වීමේ පුවත ප්‍රසිද්ධියට පත්වීමත් සමඟ, අදාළ ඩොලර් මිලියන 2.5ක අලාභය සම්බන්ධයෙන් වගකිව යුත්තේ කවුරුන්ද යන්න පිළිබඳව මහ බැංකුව සහ මුදල් අමාත්‍යාංශය එකිනෙකාට චෝදනා එල්ල කරගනිමින් සිටී.

ඕස්ට්‍රේලියාව සමඟ පවතින ද්විපාර්ශ්වික ණය ප්‍රතිපූරණයක වාරිකයක් ලෙස ගෙවීමට නියමිතව තිබූ මෙම මුදල, ඕස්ට්‍රේලියානු රජයේ අපනයන ණය ආයතනයක් වන ‘එක්ස්පෝට් ෆයිනෑන්ස් ඔස්ට්‍රේලියා’හි නිලධාරීන් ලෙස පෙනීසිටි සයිබර් අපරාධකරුවන් පිරිසක් විසින් තෙවැනි පාර්ශවයක ගිණුමකට හරවා යවා ඇත.

මහබැංකුව අවධාරණය කරන්නේ, තමන් ණය ප්‍රතිපූරණ කටයුතු සැකසීමේදී රජයේ බැංකුකරු ලෙස පමණක් කටයුතු කළ බවයි.

කෙසේවෙතත්, මුදල් විශුද්ධිකරණය පිළිබඳ සැකසහිත ගනුදෙනු කෙරෙහි මහබැංකුව ප්‍රමාණවත් අවධානයක් යොමුකර නොමැති බව මුදල් අමාත්‍යාංශයේ මතය වී තිබේ.

තමන් වෙනුවෙන් කරුණු දක්වමින් මුදල් අමාත්‍යාංශය ප්‍රකාශ කර ඇත්තේ, මෙම වංචනික ගනුදෙනුව සම්බන්ධයෙන් පැවති මුදල් විශුද්ධිකරණ අවදානම හඳුනාගැනීමට අවශ්‍ය තොරතුරු මහ බැංකුව විසින් තමන් වෙත ලබා දී නොමැති බවයි.

මුදල් අමාත්‍යාංශය පවසන පරිදි, එවැනි තොරතුරු හෙළිදරව් කිරීම මඟින් රජයේ උපදෙස් සහ ගෙවීම් මෙහෙයුම් ඵලදායී ලෙස ක්‍රියාත්මක කිරීමට බාධාවක් විය හැකි බවට මහ බැංකුව ස්ථාවරයක සිට ඇත.

එමෙන්ම, මෙම ඩොලර් මිලියන 2.5ක වංචනික ගනුදෙනුව සිදුවන අවස්ථාව වන විට, රාජ්‍ය ණය කළමනාකරණ කටයුතු ‘රාජ්‍ය ණය කළමනාකරණ කාර්යාලය’ විසින් භාරගෙන තිබූ බව ද මහ බැංකුවේ ස්ථාවරය වී තිබේ.