කළමනාකරණ සේවා දෙපාර්තමේන්තුවේ නව අධ්‍යක්ෂ ජනරාල් ලෙස එම්.කේ.ඩී.එන්. මාදම්පේ වහාම ක්‍රියාත්මක වන පරිදි පත් කිරීමට කැබිනට් මණ්ඩල අනුමැතිය හිමිව තිබේ.

මුදල්, සැලසුම් සහ ආර්ථික සංවර්ධන අමාත්‍යවරයා ලෙස ජනාධිපති අනුර කුමාර දිසානායක ඉදිරිපත් කළ යෝජනාවකට අනුව මෙම පත් කිරීමට අනුමැතිය හිමිවිය.

හිටපු අධ්‍යක්ෂ ජනරාල් විමල් එස්.කේ. ලියනගම රේගු අධ්‍යක්ෂ ජනරාල්වරයා ලෙස පත් කිරීමෙන් පසු පුරප්පාඩු වූ මෙම තනතුර සඳහා සුදුසු නිලධාරියකු නිර්දේශ කිරීම මුදල්, සැලසුම් සහ ආර්ථික සංවර්ධන අමාත්‍යාංශයේ ලේකම්වරයා විසින් පත් කරන ලද කමිටුවකට පැවරී තිබිණි.

එම කමිටුවේ නිර්දේශ මත පදනම්ව, දැනට කළමනාකරණ සේවා දෙපාර්තමේන්තුවේ අතිරේක අධ්‍යක්ෂ ජනරාල්වරිය ලෙස සේවය කරන ශ්‍රී ලංකා පරිපාලන සේවයේ විශේෂ ශ්‍රේණියේ නිලධාරිනියක වන මාදම්පේ මෙම තනතුර සඳහා තෝරාගෙන ඇත.

පසුගියදා පැවැති කැබිනට් මණ්ඩල රැස්වීමේදී මෙම පත්වීම සඳහා නිල වශයෙන් අනුමැතිය ලබා දී තිබේ.