ඉලෙක්ට්‍රොනික ලේඛන සහතික කිරීමේ පද්ධතියේ (e-DAS) අනපේක්ෂිත තාක්ෂණික දෝෂයක් හේතුවෙන්, විදේශ කටයුතු, විදේශ රැකියා සහ සංචාරක අමාත්‍යාංශයේ කොන්සියුලර් කටයුතු අංශයේ සියලුම ලේඛන සහතික කිරීමේ සේවාවන් නැවත දැනුම්දෙන තුරු තාවකාලිකව අත්හිටුවන බව නිවේදනය කර ඇත.

මෙම අත්හිටුවීම බත්තරමුල්ලේ පිහිටි කොන්සියුලර් කටයුතු අංශ මූලස්ථානයේ සහ යාපනය, ත්‍රිකුණාමලය, මහනුවර, මාතර සහ කුරුණෑගල පිහිටි සියලුම ප්‍රාදේශීය කොන්සියුලර් කාර්යාලවල සේවාවන්ට බලපායි.

e-DAS පද්ධතිය යථාතත්ත්වයට පත්කිරීම සහ හැකි ඉක්මනින් සාමාන්‍ය සේවාවන් නැවත ආරම්භ කිරීම සඳහා අදාළ තාක්ෂණික සේවා සපයන්නන් සහ අනෙකුත් පාර්ශවකරුවන් සමඟ සම්බන්ධීකරණයෙන් ක්ෂණික පියවර ගෙන ඇති බව අමාත්‍යාංශය පවසයි.

දැනටමත් මාර්ගගත හමුවීම් ලබාගෙන ඇති අයැදුම්කරුවන්ට වැඩිදුර යාවත්කාලීන කිරීම් සහ දැනුම්දීම් සඳහා e-Channeling පද්ධතිය නිරීක්ෂණය කරන ලෙස උපදෙස් දී ඇත.

පද්ධතිය යථාතත්ත්වයට පත්කළ පසු බලපෑමට ලක් වූ අයැදුම්කරුවන්ට දැනුම්දෙන බවත් මහජනතාවට සිදුවන අපහසුතාවය පිළිබඳව කනගාටුව පළකරන බවත් කොන්සියුලර් කටයුතු අංශය වැඩිදුරටත් පවසයි.