වසර 34කට පසු ඊශ්‍රායලයේ සහ ලෙබනනයේ නායකයන් බ්‍රහස්පතින්දා පළමු වරට සාකච්ඡා කරන බව එක්සත් ජනපද ජනාධිපති ඩොනල්ඩ් ට්‍රම්ප් පවසයි.

එක්සත් ජනපදයේ සිටින ඊශ්‍රායලය සහ ලෙබනනයේ තානාපතිවරුන් ඊශ්‍රායල ප්‍රහාර අවසන් කිරීම පිළිබඳ සාකච්ඡා කිරීම සඳහා වොෂින්ටනයේ දී සෘජු සාකච්ඡා පැවැත්වීමෙන් දිනකට පසුව බදාදා මෙම නිවේදනය නිකුත් විය.

“ඊශ්‍රායලය සහ ලෙබනනය අතර පොඩි විරාමයක් ගන්න උත්සාහ කරනවා,” යනුවෙන් ට්‍රම්ප් ඔහුගේ Truth Social වේදිකාවේ ලිවීය.

“නායකයන් දෙදෙනා කතා කර බොහෝ කාලයක් ගත වී තිබෙනවා, වසර 34ක් වැනි කාලයක්. එය හෙට සිදුවෙයි. හොඳයි!” යනුවෙන් ද එහි දැක්විණි.

සාකච්ඡාවලට සම්බන්ධ වන්නේ කවුරුන්ද යන්න එක්සත් ජනපද ජනාධිපතිවරයා නිශ්චිතව සඳහන් කළේ නැත.

ටෙහෙරානයට පක්ෂපාතී හිස්බුල්ලා සංවිධානය ඊශ්‍රායලයට නැවත ප්‍රහාර ආරම්භ කිරීමෙන් පසු මාර්තු 2 වැනිදා ලෙබනනය එක්සත් ජනපදයට සහ ඉරානයට එරෙහි ඊශ්‍රායල යුද්ධයට ඇදී ගියේය.

පෙබරවාරි 28 වැනිදා යුද්ධයේ පළමු දිනයේදී ඊශ්‍රායලය විසින් ඉරානයේ උත්තරීතර නායක අයතුල්ලා අලි කමේනි ඝාතනය කිරීම මෙන්ම 2024 නොවැම්බර් මාසයේදී ලෙබනනයේදී ඊශ්‍රායලය එකඟ වූ සටන් විරාමය දිනපතාම පාහේ උල්ලංඝනය කිරීම සම්බන්ධයෙන් පළිගැනීමක් ලෙස මෙම ප්‍රහාර එල්ල කළ බව හිස්බුල්ලා සංවිධානය පැවසීය.

එතැන් සිට, ඊශ්‍රායල ප්‍රහාර මගින් ලෙබනනයේ 2,000කට වැඩි පිරිසක් මිය ගොස් ඇති අතර තවත් මිලියන 1.2කට වැඩි පිරිසක් අවතැන් වී ඇත.

ඊශ්‍රායල හමුදාව දකුණු ලෙබනනයේ ගොඩබිම් ආක්‍රමණයක් ද දියත් කර ඇති අතර, වැඩි භූමි ප්‍රමාණයක් අත්පත් කර ගැනීමට සහ එය ‘ආරක්‍ෂිත කලාපයක්’ කිරීමට ඊශ්‍රායලය උත්සාහ කරයි.

ඊශ්‍රායල අගමැති බෙන්ජමින් නෙතන්යාහු බදාදා පෙරවරුවේ පැවසුවේ දකුණු ලෙබනනයේ ආක්‍රමණය නැගෙනහිර දෙසට පුළුල් කරන ලෙස හමුදාවට නියෝග කර ඇති බවයි.

හිස්බුල්ලා කණ්ඩායම නිරායුධ කර එහි උතුරු අසල්වැසියා සමඟ ‘තිරසාර සාමයක්’ අත්කර ගැනීමේ අපේක්ෂාවෙන් ඊශ්‍රායලය ලෙබනන් රජය සමඟ සාකච්ඡා පවත්වමින් සිටින බව ඔහු පැවසීය.

ඉදිරි දිනවලදී සටන් විරාමයක් සිදු වුවද, ඊශ්‍රායල ආක්‍රමණය, ඉවත් කිරීමේ නියෝග සහ ගුවන් ප්‍රහාර හේතුවෙන් තම නිවෙස්වලින් බලහත්කාරයෙන් ඉවත් කරන ලද ලෙබනනයේ මිලියන 1.2ක ජනතාවකට ඔවුන් ගෙදර යන්නේ කවදාද යන්න පිළිබඳ ගැටළුවක් පවතින බව විදෙස් මාධ්‍ය වාර්තා කරයි.