ඉදිරි දිනවලදී පැවැත්වීමට නියමිත බව කියන එක්සත් ජනපද-ඉරාන සාම සාකච්ඡා නව වටයක් පිළිබඳ කතාබහ ඉහළ යත්ම, රුසියාව ‘ඉරානයේ සාරවත් යුරේනියම් තොග පිළිබඳ ගැටළුව විසඳීමට’ අලුත් යෝජනාවක් කර ඇති බව රුසියාවේ TASS රාජ්‍ය මාධ්‍ය වාර්තා කරයි.

රුසියානු විදේශ අමාත්‍ය සර්ජි ලැව්රොව් පැවසුවේ රුසියාවට ඉරානයේ සාරවත් යුරේනියම් ඉන්ධන ශ්‍රේණියක් හෝ ගබඩා ද්‍රව්‍යයක් බවට පරිවර්තනය කිරීමට ‘ඉරානයට පිළිගත හැකි ආකාරයෙන් සාමකාමීව යුරේනියම් භාවිත අයිතිය උල්ලංඝනය නොකර’ උදව් කළ හැකි බව TASS රාජ්‍ය පුවත් ඒජන්සිය වාර්තා කළේය.

න්‍යෂ්ටික අවියක් තැනීමට හැකි ඉරානයේ සාරවත් යුරේනියම් තොග, යුද්ධය අවසන් කිරීම සඳහා එක්සත් ජනපදය සහ ඉරානය අතර පැවති සාකච්ඡාවලදී මතභේදයට තුඩු දෙන ප්‍රධාන කරුණකි.

ඉරානයේ අදාළ වැඩසටහන අවසන් කරන ලෙස එක්සත් ජනපදය ඉල්ලා ඇති අතර භූගතව වළලා ඇතැයි විශ්වාස කෙරෙන ඇස්තමේන්තුගත සාරවත් යුරේනියම් කිලෝග්‍රෑම් 460ක් නැවත ලබා ගන්නා ලෙස අවධාරණය කර ඇති බව ධවල මන්දිර නිලධාරියෙක් CNN වෙත පවසා තිබේ.

පසුගිය සති අන්තයේ ඉස්ලාමාබාද් සාකච්ඡා අතරතුර ඉරානයේ යුරේනියම් භාවිත අයිතිය අත්හිටුවීමට දෙපාර්ශ්වයම යෝජනා කළ නමුත් එක්සත් ජනපද ජනාධිපති ඩොනල්ඩ් ට්‍රම්ප් එතැන් සිට පවසා ඇත්තේ විරාමයක් පිළිබඳ අදහස තමා අකමැති බවත්, සම්පූර්ණයෙන්ම නතර කිරීමට කැමති බවත්ය.

ඒකාබද්ධ විස්තීර්ණ ක්‍රියාකාරී සැලැස්ම ලෙස හැඳින්වුණු න්‍යෂ්ටික ගිවිසුම ඔබාමා යුගයේ බලාත්මක වීමත් සමඟ රුසියාව මීට පෙර ඉරානයට යුරේනියම් සමඟ කටයුතු කිරීමට උදව් කළේය.

සාම සාකච්ඡාවලදී සාරවත් යුරේනියම් සම්බන්ධයෙන් ඉරානය ගන්නා ඕනෑම තීරණයක් රුසියාව පිළිගන්නා බව ලැව්රොව් පැවසූ නමුත් ඉරානයේ ‘සාමකාමී යුරේනියම් භාවිත අයිතිය’ පිළිබඳ ඔහුගේ තහවුරු කිරීම, බලාගාර සහ සාමකාමී අරමුණු සඳහා පමණක් යුරේනියම් භාවිත කිරීමට අවශ්‍ය බවට ටෙහෙරානයේ දිගුකාලීන ප්‍රකාශිත ස්ථාවරයට අනුකූල වේ.

චීනයේ සංචාරයකින් පසු ෂී ජින්පින් හමුවූ ලැව්රොව්, හෝමූස් සමුද්‍ර සන්ධිය වසා දැමීම හේතුවෙන් රුසියාව චීනයට සහ සැපයුම සඳහා බැටකමින් සිටින අනෙකුත් රටවලට ද බලශක්තිය ලබා දෙන බව පැවසූ බව TASS පුවත් ඒජන්සිය වාර්තා කළේය.