මාරාන්තික සරම්ප රැල්ලක් හේතුවෙන් ළමුන් ඇතුළු 100කට අධික පිරිසක් මිය ගොස් ඇති බවට මතුව තිබෙන සැකය හේතුවෙන් බංග්ලාදේශය හදිසි එන්නත් කිරීමේ ව්‍යාපාරයක් දියත් කර තිබේ.

සෞඛ්‍ය අමාත්‍යාංශ දත්තවලට අනුව, මාර්තු 15 වැනිදා සිට සැක සහිත සරම්ප රෝගීන් 7,500කට වැඩි සංඛ්‍යාවක් වාර්තා වීමත් සමග මෙම එන්නත් වැඩසටහන ඉරිදා ආරම්භ කෙරිණි .

සක සහිත පිරිස අතරින් 900කට වඩා වැඩි පිරිසක් රෝගීන් බවට තහවුරු වී ඇත.

මෙය 2025 සිට තියුණු වැඩිවීමකි.

ප්‍රාදේශීය මාධ්‍ය වාර්තා කරන්නේ මීට පෙර වසර පුරාම වාර්තා වන්නේ සරම්ප රෝගීන් 125ක් පමණ බවයි.

බංග්ලාදේශය දිගු කලක් තිස්සේ මෙම බෝවන රෝගයට එරෙහිව දරුවන්ට එන්නත් කර ඇත.

මෑත කාලීනව වාර්තා වන වසංගතය එම වැඩසටහනේ හිඩැස් හෙළි කර ඇති අතර එය කණස්සල්ලට හේතු වේ.

“එන්නත් දරුවන්ගේ පැවැත්මට පදනමයි, ළමුන් දහස් ගණනක්, විශේෂයෙන් ළාබාලතම සහ වඩාත්ම අවදානමට ලක්විය හැකි අය බරපතළ අවදානමට ලක්ව සිටිනවා” යනුවෙන් බංග්ලාදේශයේ යුනිසෙෆ් නියෝජිත රානා ෆ්ලවර්ස් ඉරිදා ප්‍රකාශයක් නිකුත් කරමින් කියා සිටියාය.

මිලියන 170ක ජනගහනයක් සිටින බංග්ලාදේශයේ, මාස නවයක් තරම් කුඩා දරුවන්ට පවා සාමාන්‍ය සරම්ප එන්නත් ලබා දෙනු ලැබේ.

නමුත් සෞඛ්‍ය දෙපාර්තමේන්තුවේ නියෝජ්‍ය අධ්‍යක්ෂ ෂහ්රියර් සජාඩ් පැවසුවේ මෑත කාලීන වසංගතයෙන් ආසාදනය වූවන්ගෙන් තුනෙන් එකක් පමණ මාස නවයට අඩු අය බවයි.

සාමාන්‍ය එන්නත් සඳහා තවමත් සුදුසුකම් නොලබන මෙම කුඩා ළදරුවන්ගේ ආසාදන විශේෂයෙන් භයානක බව යුනිසෙෆ් හි ෆ්ලවර්ස් පැවසීය.

සාමාන්‍ය එන්නත්වලට අමතරව, බංග්ලාදේශය සෑම වසර හතරකට වරක් විශේෂ සරම්ප එන්නත් කිරීමේ ව්‍යාපාර පවත්වයි.

එහෙත් මෙම ව්‍යාපාර සැලැස්මට අනුව සිදු වී නැත.

2020 සිට විශේෂ සරම්ප එන්නත් කිරීමේ ව්‍යාපාර පවත්වා නොමැත.

පළමුව කොවිඩ් නිසා සහ පසුව රටේ පැවති දේශපාලන තත්ත්වය ඊට හේතු වී තිබිණි.

දැනට ක්‍රියාත්මක එන්නත් කිරීමේ ව්‍යාපාරයට අමතරව, සෞඛ්‍ය බලධාරීන් සරම්ප හඳුනා ගන්නේ කෙසේද සහ වළක්වා ගන්නේ කෙසේද යන්න ජනතාවට උගන්වන තොරතුරු ග්‍රැෆික් ද ප්‍රකාශයට පත් කර තිබේ.

සරම්ප යනු වාතයෙන් සම්ප්‍රේෂණය වන බෝවන රෝගයක් වන අතර එය දරුණු සංකූලතා සහ මරණයට හේතු විය හැක.