ශ්‍රී ලංකා ක්‍රිකට් ආයතනයේ නව යෝග්‍යතා ප්‍රතිපත්තිය හේතුවෙන් වේග පන්දු යවන ක්‍රීඩක නුවන් තුෂාරට ඉන්දීය ප්‍රිමියර් ලීග් තරගාවලිය අහිමිවීම මේ වනවිට විවේචනයට ලක්ව තිබේ.

හිටපු වේග පන්දු යවන ක්‍රීඩක චමින්ද වාස් ද මෙම තීරණය ගත් කාලය පිළිබඳ ප්‍රශ්න කර ඇත.

ශ්‍රී ලංකා ක්‍රිකට් ආයතනය පසුගිය වසර හතර තුළ අන්තර්ජාතික ක්‍රිකට් ක්‍රීඩාවේ යෝග්‍යතා ප්‍රමිතීන් බොහෝ දුරට නොසළකා හැර ඇති බවත්, IPL තරගාවලියට පෙර හදිසියේම දැඩි මිණුම් සලකුණු ක්‍රියාත්මක කිරීම මගින් සැලසුම් කිරීම සහ ගැළපීම පිළිබඳ ගැටළු මතු කරන බවත් චමින්ද වාස් පැවසීය.

“ක්‍රිකට් සම්බන්ධයෙන් යෝග්‍යතාව අතිශයින් වැදගත්, ඒ ගැන කිසිදු සැකයක් නැහැ. නමුත් වසර ගණනාවක් තිස්සේ එය නොසළකා හැරලා IPL තරගාවලියට පෙර හදිසියේම දැඩි ප්‍රමිතීන් ක්‍රියාත්මක කරන්න බැහැ. ක්‍රීඩකයකුට දැන් තරගය මඟ හැරී යෑම විනයට වඩා දුර්වල සැලසුම් කිරීමක් ලෙසයි හැඟෙන්නේ,” යැයි වාස් පැවසීය.

ශ්‍රී ලංකා ක්‍රිකට් ආයතනය දැඩි නව යෝග්‍යතා ප්‍රතිපත්තියක් හඳුන්වා දීම මත විරෝධය නොදැක්වීමේ සහතිකය (NOC) ලබා දීම ප්‍රතික්ෂේප කිරීම හේතුවෙන් තුෂාරට IPL තරගාවලිය මග හැරී යනු ඇත.

තරගාවලියට සහභාගී වීමට ක්‍රීඩකයන්ට අවසර ලබා දීමට පෙර අලුතින් හඳුන්වා දුන් ශාරීරික කාර්ය සාධන පරීක්ෂණ සමත් වීම අනිවාර්ය කිරීමට ශ්‍රී ලංකා ක්‍රිකට් ආයතනය තීරණය කළේ මෑතකදීය.

IPL තරගාවලිය සඳහා තුෂාරගේ සුදුසුකම් මෙම යෝග්‍යතා පරීක්ෂණයේ ප්‍රතිඵලයට යටත්ව සිදු කරන ලද අතර, අවශ්‍ය ප්‍රමිතීන් සපුරා ඇත්නම් පමණක් අවසරය ලබා දෙන බව ශ්‍රී ලංකා ක්‍රිකට් ආයතනය තහවුරු කර තිබිණි.

කෙසේවෙතත්, තුෂාර අවශ්‍ය යෝග්‍යතා ලකුණු ලබා ගැනීමට අපොහොසත් වූ අතර, එහි ප්‍රතිඵලයක් ලෙස ශ්‍රී ලංකා ක්‍රිකට් ආයතනය විරෝධය නොදැක්වීමේ සහතිකය නිකුත් කිරීම ප්‍රතික්ෂේප කර තිබිණි.

මෙම පියවර නිසා ඔහුට ආසන්න වශයෙන් රුපියල් කෝටි 1.6ක් වටිනා රෝයල් චැලෙන්ජර්ස් බැංගලෝර් කොන්ත්‍රාත්තුව අහිමි විය හැකිය.

2025 ආසියානු කුසලාන තරඟාවලියේදී ප්‍රධාන වේග පන්දු යවන්නකුව සිට පසුව T20 ලෝක කුසලානය සඳහා ස්ථානය අහිමි වූ තුෂාරට මෙම නවතම සිදුවීම විශාල පහරකි.

ආබාධ හේතුවෙන් වේග පන්දු යවන්නන් කිහිප දෙනෙකු ඉවත් කර තිබුණද, ඔවුන් වෙනුවට තුෂාර තේරීම සළකා නොබැලීම ජාතික සැකසුම තුළ ඔහුගේ ස්ථාවරය පිළිබඳ තවදුරටත් කණස්සල්ලට හේතු විය.

තුෂාර දැනට ආබාධයකට ලක්ව නොමැති අතර තරඟවලදී පන්දු යැවීමට හැකියාව ඇති නමුත්, ඔහුගේ සමස්ත යෝග්‍යතා මට්ටම් පිළිබඳ ගැටළු පවතින බවත්, තේරීම් කමිටුව දැඩි ස්ථාවරයක් ගැනීමට පෙළඹී ඇති බවත් ආරංචි මාර්ග පෙන්වා දුන්නේය.

ශ්‍රී ලංකා ක්‍රිකට් ආයතනය මෙවර දැඩි ප්‍රවේශයක් ගනිමින්, නව යෝග්‍යතා මිණුම් සලකුණු සාර්ථකව සමත් වූ ක්‍රීඩකයන්ට පමණක් විරෝධය නොදැක්වීමේ සහතිකය නිකුත් කිරීමට කටයුතු කර තිබේ.