යුද්ධය අවසන් කිරීම සඳහා සාකච්ඡා සිදුවෙමින් පවතින බව ඇමරිකානු ජනාධිපති ඩොනල්ඩ් ට්‍රම්ප් පැවසීමෙන් පසු ආසියානු වෙළඳාමේදී තෙල් මිල තියුණු ලෙස පහත වැටී තිබේ.

බ්‍රෙන්ට් බොරතෙල් බැරලයකට 6.6%කින් පහත වැටී ඩොලර් 97.56ක් වූ අතර, එක්සත් ජනපදය වෙළඳාම් කරන තෙල් බැරලයක් 5.5%කට වඩා පහත වැටී ඩොලර් 87.20ක් විය.

යුද්ධය අවසන් කිරීම සඳහා සාකච්ඡා දැන් සිදුවෙමින් පවතින බවත්, එක්සත් ජනපදය සාකච්ඡා කරමින් සිටි පුද්ගලයන් ‘ගිවිසුමක් ඇති කර ගැනීමට ඉතා කැමති’බවත් ට්‍රම්ප් අඟහරුවාදා පැවසීය.

කෙසේවෙතත් ටෙහෙරානයේ නිලධාරියකු සඳුදා පවසා තිබුණේ ඊශ්‍රායලය සහ ඉරානය අතර ප්‍රහාර හුවමාරු වෙමින් පවතින බැවින්, එක්සත් ජනපදය සහ ඉරානය අතර සාකච්ඡා පවතින බවට ‘ව්‍යාජ ප්‍රවෘත්ති’ ප්‍රකාශ වන බවයි.

එක්සත් ජනපද උප ජනාධිපති ජේ.ඩී. වැන්ස් සහ රාජ්‍ය ලේකම් මාර්කෝ රුබියෝ යුද්ධය අවසන් කිරීම සඳහා සාකච්ඡාවලට සම්බන්ධ වූ බව ට්‍රම්ප් පැවසීය.

ඉරානයට එල්ල වූ එක්සත් ජනපද-ඊශ්‍රායල ප්‍රහාර ‘පාලන තන්ත්‍ර වෙනසක්’ ඇති කර ඇති බවත්, ඉරාන නායකයන් කිසි ලෙසකින් හෝ න්‍යෂ්ටික අවියක් නොමැති බවට නැවත නැවතත් පැවසූ බවත් ජනාධිපතිවරයා පැවසීය.

නමුත් එක්සත් ජනපදය සමඟ සම්බන්ධතා පැවැත්වූ බවට කරන ලද ප්‍රකාශ ටෙහෙරානය මීට පෙර ප්‍රතික්ෂේප කරමින් කියා සිටියේ එම ප්‍රකාශ වෙළඳපොළ හැසිරවීමේ උත්සාහයක් බවයි.

බ්‍රෙන්ට් බොරතෙල් බැරලයක මිල අඟහරුවාදා ඩොලර් 100ට වඩා ඉහළ ගිය අතර නවතම පහත වැටීම්වලින් පසුව පවා පෙබරවාරි 28 වැනිදා එක්සත් ජනපදය සහ ඊශ්‍රායලය ඉරානයට ප්‍රහාර එල්ල කිරීමට පෙර පැවති මට්ටමට වඩා බෙහෙවින් ඉහළ මට්ටමක පවතී.

මෙම ගැටුම ගෝලීය බලශක්ති අර්බුදයකට තුඩු දී ඇති අතර ලොව පුරා රජයන් මෑත සතිවල ඒ ඒ රටවල ආර්ථිකයන් කෙරෙහි ඇති කරන බලපෑම ලිහිල් කිරීම අරමුණු කරගත් විවිධ පියවර ප්‍රකාශයට පත් කර තිබේ.

බලශක්ති දැවැන්තයකු වන ෂෙල් හි ප්‍රධානියා අඟහරුවාදා අනතුරු ඇඟවූයේ ඉන්ධන හා ගෑස් හිඟය ලබන මාසයේ යුරෝපයට බලපෑ හැකි බවයි.

“දකුණු ආසියාව මුලින්ම මීට ගොදුරු වුණා. එය අග්නිදිග ආසියාවට, ඊසානදිග ආසියාවට සහ පසුව අප්‍රේල් මාසය පැමිණෙන විට යුරෝපයට වැඩි වශයෙන් පැතිරෙයි,” යනුවෙන් ෂෙල් හි ප්‍රධාන විධායක වේල් සවන් හූස්ටන්හි පැවති බලශක්ති කර්මාන්ත සමුළුවකට එක්වෙමින් පැවසීය.