අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් ශ්‍රී ලංකා රේගුවේ සේවයෙන් පහකරන ලද නිලධාරියකු අත්අඩංගුවට ගෙන තිබේ.

මිනිස් පරිභෝජනයට නුසුදුසු යැයි සැලකෙන රාජසන්තක කරන ලද පාම් තෙල් නීතිවිරෝධී ලෙස විකිණීම සම්බන්ධයෙන් සිදු කරන ලද පරීක්ෂණයකින් පසුව ඔහු අත්අඩංගුවට ගෙන ඇත.

ශ්‍රී ලංකා රේගුවේ මධ්‍යම දූෂණ විරෝධී ඒකකය විසින් සිදුකරන ලද විමර්ශනයේදී, ආහාර හා ඖෂධ පරීක්ෂකවරුන්, එහි අඩංගු දෑ අනාරක්ෂිත බව තීරණය කිරීමෙන් පසු රේගු ආඥා පනතේ 109 වගන්තිය යටතේ පාම් තෙල් බහාලුම් පහක් විනාශ කිරීමට නියමිතව තිබූ බව අනාවරණය විය.

කෙසේවෙතත්, තොගය විනාශ කිරීම වෙනුවට, නිලධාරියා බහාලුම් පෞද්ගලික ස්ථානයකට ප්‍රවාහනය කර එක් බහාලුමක අන්තර්ගත තෙල් රුපියල් මිලියන 4කට විකුණා ඇති බව කියනු ලැබේ.

නීතිවිරෝධී විකිණීම වසන්කිරීම සඳහා, සැකකරු බහාලුම් පහම සාර්ථකව විනාශ කර ඇති බවට ව්‍යාජ ලේඛන ඉදිරිපත් කළ බව වාර්තා වේ.

පෞද්ගලික ලාභයක් ලබාගැනීමට හෝ වෙනත් පාර්ශවයකට අනවශ්‍ය වාසියක් ලබාදීම සඳහා අදාළ ලිපිගොනු ඔහු සන්තකයේ තබාගෙන දූෂණ වරද සිදුකළ බවට චෝදනා එල්ල වී තිබේ.

පිළියන්දල, සිද්ධමුල්ල ප්‍රදේශයේ පදිංචිකරුවකු වන සැකකරු කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි.