ලොව විශාලතම බොරතෙල් ආනයනකරු වන චීනය, මෑත වසරවලදී ඔපෙක් (OPEC) සාමාජික ඉරානයෙන් තෙල් මිලදී ගන්නා ප්‍රධානතම රට වී ඇත.

කෙසේ වෙතත්, ඉරාන තෙල් සම්බන්ධයෙන් එක්සත් ජනපදය ලබා දී ඇති දින 30 ක සම්බාධක සහනයෙන් (sanctions waiver) පසුව, චීනයට දැඩි තරඟකාරීත්වයකට මෙන්ම ඉහළ මිල ගණන්වලට මුහුණ දීමට සිදුවනු ඇත.

බීජිං පාලනය මෑත වසරවලදී සිය ආනයන වියදම්වලින් ඩොලර් බිලියන ගණනක් ඉතිරි කර ගැනීම සඳහා බටහිර සම්බාධකවලට මුහුණ දී සිටින වෙනිසියුලාව, රුසියාව සහ ඉරානය යන රටවල් තුනෙන්ම වැඩිම තෙල් ප්‍රමාණයක් මිලදී ගෙන ඇත.

Kpler විශ්ලේෂණ ආයතනයේ 2025 දත්ත වලට අනුව, ඉරානය අපනයනය කරන තෙල් ප්‍රමාණයෙන් සියයට 80 කට වඩා වැඩි ප්‍රමාණයක් මිලදී ගනු ලබන්නේ චීනය විසිනි.

ඉරානයේ න්‍යෂ්ටික වැඩසටහනට ලැබෙන මූල්‍ය පහසුකම් අත්හිටුවීමේ අරමුණින් පනවා ඇති එක්සත් ජනපද සම්බාධක හේතුවෙන් ඉරාන තෙල් සඳහා සිටින්නේ සීමිත ගැනුම්කරුවන් පිරිසකි.

Kpler දත්ත පෙන්වා දෙන්නේ පසුගිය වසරේ චීනය දිනකට සාමාන්‍යයෙන් ඉරාන තෙල් බැරල් මිලියන 1.38ක් මිලදී ගෙන ඇති බවයි.

එය චීනය මුහුදු මාර්ගයෙන් ආනයනය කරන ලද දිනකට බැරල් මිලියන 10.27ක් වූ මුළු තෙල් ප්‍රමාණයෙන් සියයට 13.4ක් නියෝජනය කරයි.