August 21, 2026
නව මහා පරිමාණ හමුදා මෙහෙයුම්වල අවශ්යතාව අවම කරමින්, ඉරානයට එරෙහිව ඉතිහාසයේ දරුණුතම සම්බාධක පැනවීමට එක්සත් ජනපදය පියවර ගන්නා බව ඇමරිකානු භාණ්ඩාගාර ලේකම් ස්කොට් බෙසෙන්ට් පැවසීය.
ඉරානයට ඕනෑම ආකාරයක සහනයක් ලබා දෙන ඕනෑම රටකට එරෙහිව ආර්ථික ප්රතිවිපාක එල්ල වන බවට ජනාධිපති ඩොනල්ඩ් ට්රම්ප් සිදුකළ ආර්ථික යුද්ධය පිළිබඳ තර්ජනයෙන් පසුව බෙසෙන්ට් මෙම අදහස් පළ කළේය. මේ පිළිබඳ වැඩිදුර තොරතුරු ලබන සතියේදී ප්රකාශයට පත් කිරීමට නියමිතය.
මාස හයකට ආසන්න කාලයක් තිස්සේ පවතින අර්බුදය අවසන් කිරීමේ අරමුණින් එක්සත් ජනපදය එල්ල කළ මෙම මුල්ය තර්ජන හමුවේ, මැදපෙරදිග තෙල් සැපයුමට බාධා එල්ල වීමත් සමඟ බ්රහස්පතින්දා වන විට ලෝක වෙළඳපොලේ බොරතෙල් මිල සති තුනකට පසු ඉහළම මට්ටමට පැමිණියේය.
“මේ හේතුවෙන් තෙල් මිල මෙලෙස ඉහළ ගියේ මන්දැයි මට පැහැදිලි නැහැ,” යනුවෙන් බෙසෙන්ට් CNBC පුවත් සේවයට පැවසීය.
“අප උපරිම ආර්ථික බලපෑමක් එල්ල කරන්නේ නම්, නැවත වතාවක් විශාල මට්ටමේ හමුදාමය ක්රියාමාර්ගයක් අවශ්ය නොවීමට වැඩි ඉඩක් තිබෙනවා,” හමුදා බලය භාවිත කිරීම සම්බන්ධයෙන් අදහස් දක්වමින් ඔහු වැඩිදුරටත් සඳහන් කළේය.
ගල්ෆ් කලාපීය රටවල් ද සම්බන්ධ කරගනිමින් හටගත් මෙම ගැටුම හේතුවෙන් දහස් සංඛ්යාත පිරිසක් ජීවිතක්ෂයට පත්ව ඇති අතර, ලෝක තෙල් වෙළඳාමෙන් පහෙන් එකක් ප්රවාහනය කෙරෙන හෝමූස් සමුද්ර සන්ධිය හරහා නෞකා ගමනාගමනය සීමා කිරීමට ඉරානය පියවර ගැනීමත් සමඟ ලෝක වෙළඳපොළ දැඩි කැළඹීමකට ලක්විය.
හෝමූස් සමුද්ර සන්ධිය හරහා නෞකා ගමනාගමනය නැවත සාමාන්ය තත්ත්වයට පත් කරමින් මෙම ගැටුම අවසන් කිරීමේ අරමුණින්, එක්සත් ජනපදය සහ ඉරානය අප්රේල් සහ ජූනි මාසවලදී අවස්ථා දෙකකදී සටන් විරාම ගිවිසුම් ප්රකාශයට පත් කළද, ඒ දෙකම ඉතා කෙටි කාලයකින් අහෝසි වී ගියේය.
