අයිස් මත්ද්‍රව්‍ය, දුම්කොළ, ජංගම දුරකථන සහ දුරකථන චාජර් අඩංගු බෑගයක් ගාල්ල බන්ධනාගාරයේ තාප්පයට ඉහළින් විසි කිරීමට සූදානම් වෙමින් සිටි සැකකරුවකු ඊයේ (20) අත්අඩංගුවට ගෙන තිබේ.

පොලිස් විශේෂ කාර්ය බලකාය පැවසුවේ සැකකරු ගාල්ල කන්දේවත්ත ප්‍රදේශයේදී අත්අඩංගුවට ගත් බවයි.

අක්මීමන කඳවුරට අනුයුක්ත විශේෂ කාර්ය බලකා නිලධාරීන්ට ලැබුණු තොරතුරක් මත ගාල්ලේ පදිංචි 30 හැවිරිදි සැකකරු ඔහුගේ නිවසේ දී අත්අඩංගුවට ගෙන ඇත.

සෝදිසි කිරීමේදී, විශේෂ කාර්ය බලකා නිලධාරීන් අයිස් මත්ද්‍රව්‍ය ග්‍රෑම් 2.590ක්, දුම්කොළ ග්‍රෑම් 110ක්, රෝල් කරන ලද දුම්කොළ ග්‍රෑම් 540ක්, ජංගම දුරකථන හතරක් සහ ජංගම දුරකථන චාජර් 23ක් සොයාගෙන තිබේ.

අත්අඩංගුවට ගත් සැකකරු වැඩිදුර පරීක්ෂණ සඳහා ගාල්ල පොලිස් ස්ථානයට භාර දී ඇත.