අපනයනකරුවන්ට සහය වීම සඳහා රජය මූල්‍ය දිරිගැන්වීම් ලබා දුන්නද, පෙබරවාරි මාසයේදී පාකිස්ථානයේ සහල් අපනයන ක්ෂේත්‍රය දැඩි පසුබෑමකට ලක්ව ඇති අතර සහල් නැව්ගත කිරීම් ශීඝ්‍රයෙන් පහත වැටී ඇත.

මෙම පහත වැටීම හේතුවෙන් ඉස්ලාමාබාද් පාලනයේ ප්‍රතිපත්තිමය ප්‍රවේශය පිළිබඳව දැඩි ප්‍රශ්න මතු වී තිබේ.

කර්මාන්ත ක්ෂේත්‍රයේ පාර්ශවකරුවන් තර්ක කරන්නේ, රජය ලබා දුන් සහනාධාර ක්‍රමය ජාත්‍යන්තර වෙළඳපොළ තුළ පාකිස්ථානයේ ස්ථාවරය ශක්තිමත් කිරීමට අපොහොසත් වී ඇති බවයි.

ඩෝන් (Dawn) පුවත්පත වාර්තා කරන පරිදි, මෙම වැඩපිළිවෙළ හේතුවෙන් දේශීය සහල් මිල ඉහළ ගොස් ඇති අතර, එමඟින් ලෝක වෙළඳපොළ තුළ පාකිස්ථාන සහල්වල තරඟකාරීත්වය අඩු වී ඇත.

පාකිස්ථාන සංඛ්‍යාලේඛන කාර්යාංශයේ නිල දත්ත වලට අනුව, පෙබරවාරි මාසයේදී මුළු සහල් අපනයනය 35.38% කින් පහත වැටී ඇත.

අපනයනකරුවන්ට දේශීය බදු සහ අයභාර පියවා ගැනීම සඳහා රජය විසින් විශේෂ තීරුබදු සහන ක්‍රමයක් හඳුන්වා දී තිබියදීත් මෙම පසුබෑම සිදු විය.

මෙම වැඩපිළිවෙළ යටතේ රජය පකිස්ථාන රුපියල් බිලියන 15ක් පමණ වෙන් කර ඇති අතර, එහිදී සාමාන්‍ය සහල් (coarse rice) අපනයනය සඳහා 3%ක සහ බාස්මතී සහල් අපනයනය සඳහා 9%ක වට්ටමක් (rebate) ලබා දී ඇත. එසේ වුවද, අපනයන කාර්යසාධනය දිගින් දිගටම පිරිහී ගියේය.

සංඛ්‍යාලේඛන කාර්යාංශයේ දත්ත පෙන්වා දෙන්නේ පෙබරවාරි මාසයේදී බාස්මතී සහල් අපනයන ආදායම 19.21% කින් සහ අපනයන ප්‍රමාණය 27.98% කින් පහත වැටී ඇති බවයි.

සාමාන්‍ය සහල් තත්ත්වය මීටත් වඩා අයහපත් වූ අතර, එහි අපනයන ආදායම 42.50% කින් සහ අපනයනය කළ ප්‍රමාණය 32.94% කින් පහත වැටී ඇත