පාකිස්ථානයේ සෙනෙට් සභාවේ අයවැයෙන් සෙනෙට් සභාපතිවරයා වෙනුවෙන් රුපියල් මිලියන 90ක් වටිනා සුඛෝපභෝගී රථයක් මිලදී ගත් බව සෙනෙට් සභාපති යූසුෆ් රාසා ගිලානි තහවුරු කර ඇත.

වාර්තා වන අන්දමට, මෙම මිල අධික වාහනය සෙනෙට් අයවැය ප්‍රතිපාදන මගින් මිලදී ගෙන ඇති අතර එය දැනටමත් පාකිස්ථාන සෙනෙට් ලේකම් කාර්යාලය වෙත ලැබී තිබේ.

මෙම මිලදී ගැනීම සම්බන්ධයෙන් ‘Express News’ කළ විමසීමකදී ගිලානි ස්ථිර කළේ එම මෝටර් රථය මිලදී ගත් බවයි.

“ඔව්, අපි සෙනෙට් අයවැයෙන් මෝටර් රථය මිලදී ගත්තා, නමුත් එය ඇණවුම් කළේ පසුගිය වසරේ මැයි මාසයේදී,” යැයි ඔහු පැවසීය.

පසුගිය වසරේ සෙනෙට් අයවැයෙන් ඉතිරි වූ මුදල් භාවිතා කරමින් මෙම වාහනය ඇණවුම් කළ බව ඔහු පැහැදිලි කළේය.

රටේ පවතින ආර්ථික තත්ත්වය සලකා තමා වාහනය නැවත භාරදීමට උත්සාහ කළ නමුත්, වාහනය දැනටමත් පැමිණ ඇති බව තමාට දන්වන ලදැයි ගිලානි වැඩිදුරටත් පැවසීය.

මීට පෙර ජුනි මාසයේදී ෆෙඩරල් මුදල් අමාත්‍ය මුහම්මද් අවුරන්ග්සෙබ් පාර්ලිමේන්තුවේදී ප්‍රකාශ කළේ සෙනෙට් සභාපතිවරයා සහ ජාතික සභාවේ කථානායකවරයා රුපියල් 2,150,000 ක මාසික වැටුපක් ලබන බවයි.

තිව්‍ර වෙමින් පවතින ආර්ථික අර්බුදය හමුවේ මෙම මිලදී ගැනීම සම්බන්ධයෙන් පකිස්ථානය තුළ දැඩි මහජන විරෝධයක් සහ දේශපාලන විවේචන එල්ල වී ඇත:

පකිස්ථානය දැනටමත් අධික උද්ධමනය සහ විදේශ විනිමය හිඟය හේතුවෙන් ජාත්‍යන්තර මූල්‍ය අරමුදලෙන් (IMF) ආධාර ලබා ගනිමින් සිටින පසුබිමක, මෙවැනි අධික පිරිවැයක් දැරීම ජනතාවගේ දැඩි අප්‍රසාදයට හේතු වී තිබේ.

රජය විසින් රාජ්‍ය වියදම් කපා හැරීමේ පිරිමැසුම් ප්‍රතිපත්ති ප්‍රකාශයට පත් කර ඇති මොහොතක, ඉහළ නිලධාරීන් මෙවැනි වරප්‍රසාද භුක්ති විඳීම පරස්පර විරෝධී බව විචාරකයෝ පවසති.

විපක්ෂ කණ්ඩායම් චෝදනා කරන්නේ සාමාන්‍ය ජනතාව එදිනෙදා ජීවත් වීමට අරගල කරන විට, පාලකයින් රජයේ මුදල් අවභාවිත කරමින් සුඛෝපභෝගී ජීවිත ගත කරන බවයි.

සෙනෙට් සභාපතිවරයා ඇතුළු ඉහළ නිලධාරීන් ලබන රුපියල් මිලියන 2කට අධික මාසික වැටුප ද මේ වන විට දැඩි කතාබහට ලක්ව ඇති කරුණකි.