බාලවයස්කාර දැරියක දූෂණය කිරීමේ චෝදනාවට වරදකරු වූ අයෙකුට ගාල්ල මහාධිකරණ විනිසුරු පූර්ණිමා පරණගම විසින් වසර 17ක බරපතළ සිර දඬුවමක් සහ චෝදනා දෙකක් යටතේ රුපියල් 32500ක දඩයක් නියම කරන ලදී.

වින්දිත කාන්තාවට රුපියල් ලක්ෂ 4ක් සහ ඔහුගෙන් ඇයට උපන් දරුවාට රුපියල් ලක්ෂ 6ක් වන්දි වශයෙන් ගෙවීමට ද ඔහුට නියෝග කෙරිණි.

දඩය නොගෙවන්නේ නම් විත්තිකරුට තවත් මාස හයක සිර දඬුවමක් සහ වන්දි ගෙවීම පැහැර හරින්නේ නම් මාස හයක සිර දඬුවමක් නියම කරන ලදී.

පැමිණිල්ල වෙනුවෙන් පොලිසිය සාක්ෂි දෙමින් කියා සිටියේ 15 හැවිරිදි දැරිය සමඟ ආදරයෙන් බැඳී සිටි විත්තිකරු වන වෙල්ලගේ ජයවර්ධන සිල්වා ඇයව කොග්ගල ප්‍රදේශයේ නිවසකට රැගෙන ගොස් 2015 දෙසැම්බර් 01 වැනිදා හෝ ඊට ආසන්න දිනකදී දූෂණය කර ඇති බවයි.

පයාගල ප්‍රදේශයේ පදිංචිකරුවකු වූ විත්තිකරු ඒ වන විට වයස අවුරුදු 42ක් වූ අතර ඔහුට අහංගම ප්‍රදේශයේ දැරිය මුණගැසී ඇත්තේ එම ප්‍රදේශයේ කුරුඳු කපන්නකු ලෙස සේවය කරන අතරතුරය.

දැරිය ගැබ්ගත් විට ඇය පොලිසියට පැමිණිල්ලක් කර තිබේ.

DNA පරීක්ෂණයෙන් විත්තිකරු දරුවාගේ පියා බව තහවුරු වී ඇති බව පැමිණිල්ල අධිකරණයට දැනුම් දුන්නේය.