ඉරානය තම කලාපීය අසල්වැසියන්ට එල්ල කරන ‘දරුණු ප්‍රහාර’ හෙළා දකිමින් එක්සත් ජාතීන්ගේ ආරක්ෂක මණ්ඩලයට (UNSC) ගෙන එනු ලැබූ යෝජනාවකට සම අනුග්‍රහය දැක්වීමට සම්බන්ධ වීම ශ්‍රී ලංකාව ප්‍රතික්ෂේප කර තිබේ.

අදාළ යෝජනාවට එක්සත් ජාතීන්ගේ සාමාජික රටවල් 130කට වැඩි සංඛ්‍යාවක් සම අනුග්‍රහය දක්වමින් සම්බන්ධ වී තිබිණි.

අදාළ යෝජනාව පසුගිය මාර්තු 11 වැනිදා සම්මත කරන ලදී.

“අපි ප්‍රතිපත්තියක් ලෙස කිසිදු රටකට විශේෂිත යෝජනාවක් සඳහා සම්බන්ධ වෙන්නේ නැහැ,” යනුවෙන් යෝජනාවට සම අනුග්‍රහය නොදැක්වීමට ශ්‍රී ලංකාවේ තීරණය විමසූ විට විදේශ අමාත්‍ය විජිත හේරත් පවසා තිබිණි.

බහරේනයේ ප්‍රමුඛත්වයෙන් ගෙන එන ලද යෝජනාවේ සම අනුග්‍රාහකයන් අතර ඕස්ට්‍රේලියාව, ඔස්ට්‍රියාව, බංග්ලාදේශය, භූතානය, කැනඩාව, ඊජිප්තුව, ප්‍රංශය, ජර්මනිය, ග්‍රීසිය, ඉතාලිය, ජපානය, කුවේට්, මැලේසියාව, මාලදිවයින, මියන්මාරය, නවසීලන්තය, නෝර්වේ, ඕමානය, පාකිස්ථානය, කටාර්, සෞදි අරාබිය, සිංගප්පූරුව, ස්පාඤ්ඤය, යුක්රේනය, එක්සත් අරාබි එමීර් රාජ්‍යය, එක්සත් රාජධානිය, ඇමරිකා එක්සත් ජනපදය, යේමනය සහ සැම්බියාව ඇතුළු රටවල් 130කට වැඩි සංඛ්‍යාවක් සමඟ ඉන්දියාව ද විය.

ආරක්ෂක කවුන්සිලයේදී, සාමාජිකයන් 15 දෙනාගෙන් 13 දෙනෙක් පක්ෂව ඡන්දය දුන් අතර, ස්ථිර සාමාජිකයන් දෙදෙනෙකු වන රුසියාව සහ චීනය ඡන්දය දීමෙන් වැළකී සිටියේය.

යෝජනාවේ නියමයන් අනුව, කවුන්සිලය බහරේනය, කුවේට්, ඕමානය, කටාර්, සෞදි අරාබිය, එක්සත් අරාබි එමීර් රාජ්‍යය සහ ජෝර්දානයට එරෙහිව ඉරානය එල්ල කළ ප්‍රහාර දැඩි ලෙස හෙළා දුටු අතර එම රටවල ස්වෛරීභාවය, භෞමික අඛණ්ඩතාව සහ දේශපාලන ස්වාධීනත්වය සඳහා එහි දැඩි සහයෝගය නැවත අවධාරණය කළේය.

යෝජනාව ඉරානයට එරෙහි එක්සත් ජනපද-ඊශ්‍රායල ආක්‍රමණය හෙළාදැක තිබුණේ නැත.