හෝමාගම, නියඳගල ප්‍රදේශයේ සුසාන භූමියක බිළිඳෙකුගේ සොහොනක් හෑරීමට උත්සාහ කළ බවට චෝදනා එල්ල වී ඇති පුද්ගලයකු සම්බන්ධයෙන් පොලිසිය පරීක්ෂණයක් ආරම්භ කර තිබේ.

අක්කර හතරක ඉඩමක පිහිටි සුසාන භූමියකින් මෙම සිදුවීම වාර්තා වී ඇති අතර එම සුසාන භූමියේ ආදාහනාගාරයක් ද වේ.

තම පියා භූමදාන කළ ප්‍රදේශය පිරිසිදු කිරීමට අවශ්‍ය බව පවසමින් පසුගිය බදාදා (11) පස්වරු 2ත් 2.30ත් අතර කාලය තුළ පුද්ගලයකු සුසාන භූමියට ඇතුළු වී ඇති බව පොලිසිය පවසයි.

කෙසේවෙතත්, සුසාන භූමියේ භූමදාන කළ ස්ථාන කිහිපයක් ඇති අතර, එම පුද්ගලයා සවලක් රැගෙන බිළිඳා භූමදාන කළ ස්ථානය හාරා ඇති බව වාර්තා වේ.

ආදාහනාගාරයේ සේවකයකුට මතු වූ සැකය අනුව සුසාන භූමිය අධීක්ෂණය කරන හෝමාගම ප්‍රාදේශීය සභාවට දැනුම් දී ඇත.

පසුව ප්‍රාදේශීය සභාව හෝමාගම පොලිසියට දැනුම්දීමත් සමග පොලිසිය පරීක්ෂණයක් ආරම්භ කර තිබිණි.

මූලික පරීක්ෂණවලින් හෙළි වී ඇත්තේ මිනීවළ හාරා ඇති බවත්, බිළිඳාගේ දේහය අඩංගු මිනී පෙට්ටියේ ඉහළ කොටස විවෘත කර ඇති බවත්ය.

පසුව සිද්ධිය හෝමාගම මහේස්ත්‍රාත් අධිකරණයට වාර්තා කරන ලද අතර, වැඩබලන මහේස්ත්‍රාත් රොෂාන් කුරුප්පුආරච්චි එම ස්ථානය පරීක්ෂා කළේය.

විමර්ශනයෙන් පසු මිනී පෙට්ටිය මුද්‍රා තබා එහි මුල් තත්ත්වයට පත් කරන ලෙස මහේස්ත්‍රාත්වරයා නියෝග කළේය.

සැකකරුගේ අනන්‍යතාව තවමත් තහවුරු වී නොමැති බව පොලිසිය පැවසීය.

බිළිඳාගේ සිරුර මාස දෙකකට පමණ පෙර එම ස්ථානයේ මිහිදන් කර ඇති බව වාර්තා වේ.

මෙය බිළිඳාගේ ගෙලෙහි බැඳ තිබූ බවට විශ්වාස කෙරෙන පංචායුධයක් සොරකම් කිරීමට ගත් උත්සාහයක් බවට විමර්ශකයෝ සැක පළ කරති.

වැඩිදුර පරීක්ෂණ සිදුවෙමින් පවතී.