ඉන්දියාව වැනි සාමයට ලැදි රටක් එක්සත් ජාතීන්ගේ සංවිධානයේ ස්ථිර සාමාජිකයෙකු කළ යුතු බව විපක්ෂ නායක සජිත් ප්‍රේමදාස පැවසුවේය.

ANI පුවත් සේවය සමඟ අදහස් දක්වමින් ඔහු පැවසුවේ, ගෝලීය බලවතුන්ගේ යථාර්ථය පිළිබිඹු වන පරිදි එක්සත් ජාතීන්ගේ සංවිධානයේ ප්‍රතිසංස්කරණ සිදු විය යුතු බවට ශ්‍රී ලංකාව සැමවිටම පෙනී සිටි බවයි.

“එක්සත් ජාතීන්ගේ පද්ධතිය ගෝලීය බල ව්‍යුහය පිළිබිඹු කළ යුතුයි. ඒ නිසයි ඉන්දියාව එක්සත් ජාතීන්ගේ ආරක්ෂක මණ්ඩලයේ ස්ථිර සාමාජිකයෙකු විය යුතු බවට මා විවෘතව පෙනී සිටින්නේ. ඔබ හොඳින්ම දන්නා පරිදි, දැනට ආරක්ෂක මණ්ඩලයේ සිටින ස්ථිර සාමාජිකයන් පස් දෙනා සතුව ප්‍රධාන බලතල පවතිනවා. ඉන්දියාව වැනි සාමකාමී රටකට එහි නිසි තැන ලබා දිය යුතු බව මම විශ්වාස කරනවා, මන්ද එය වත්මන් ලෝක බල දේශපාලනයේ යථාර්ථයයි,” ඔහු පැවසීය.

මැදපෙරදිග පවතින ගැටුම්කාරී තත්ත්වය හමුවේ එක්සත් ජාතීන්ගේ සංවිධානයේ භූමිකාව පිළිබඳව විමසූ විට ඔහු කියා සිටියේ, මෙම ආයතනය පිහිටුවා ඇත්තේ බලය භාවිත කිරීම වැළැක්වීමේ රීති මාලාවක් සමඟ බවයි.

“දෙවන ලෝක යුද්ධයෙන් පසු ලෝක පාලනය සඳහා එක්සත් ජාතීන්ගේ පද්ධතිය බිහි වුණා. එය ස්ථාපිත කළේ බලය භාවිත කිරීම සීමා කරන (2.4 වගන්තිය), වෙනත් රටක අභ්‍යන්තර කටයුතුවලට මැදිහත් වීම වළක්වන (2.7 වගන්තිය) සහ බලය භාවිත කළ හැක්කේ ආත්මාරක්ෂාව සඳහා පමණක් බව (51 වගන්තිය) පවසන නීති රීති සමඟයි. ජාත්‍යන්තර සාමය සහ ආරක්ෂාව ප්‍රවර්ධනය කිරීම සඳහා මෙම රීති සකස් කර තිබෙනවා. දෙවන ලෝක යුද්ධයෙන් පසු මේ දක්වා මහා ලෝක යුද්ධයක් ඇති නොවීමට මෙහි බලපෑම අප අගය කළ යුතුයි,” ඔහු වැඩිදුරටත් සඳහන් කළේය.