සුපිරි ගායිකා රිහානාගේ නිවසට වෙඩි ප්‍රහාර කිහිපයක් එල්ල කළ කාන්තාවක අත්අඩංගුවට ගත් බව ලොස් ඇන්ජලීස් පොලිසිය පවසයි.

එක්සත් ජනපදයේ දේශීය පුවත් සේවා වෙත අදහස් දක්වමින් බලධාරීන් ප්‍රකාශ කළේ, මනුෂ්‍ය ඝාතන සිදුකිරීමට තැත්කිරීමේ සැකය මත 35 හැවිරිදි කාන්තාවක අත්අඩංගුවට ගත් බවත් ඇය සතුව තිබූ ගිනි අවියක් සොයාගත් බවත්ය.

මෙම වෙඩිතැබීම සඳහා AR-15 මාදිලියේ ප්‍රහාරක රයිෆලයක් භාවිත කර ඇති බව වාර්තා වේ.

සිද්ධියෙන් කිසිවෙකුටත් තුවාල සිදුවී නොමැත.

බෙවර්ලි හිල්ස් ප්‍රදේශයෙන් ඉරිදා දින පස්වරු 1:15 ට පමණ වෙඩි තැබීමක් පිළිබඳ වාර්තා වීමත් සමඟ නිලධාරීන් එම ස්ථානයට පැමිණ ඇත.

රිහානාගේ නිවස බව පැවසෙන මන්දිරයේ ප්‍රධාන ගේට්ටුවේ වෙඩි උණ්ඩ වැදීමෙන් ඇති වූ බව පැවසෙන සිදුරු ජනමාධ්‍ය වාර්තා මගින් පෙන්වා දී තිබිණි.

පොලිසිය පැවසුවේ, සුදු පැහැති ටෙස්ලා රථයකින් පැමිණි සැකකාරියක් පාරේ අනෙක් පස සිට නිවස දෙසට මෙලෙස වෙඩි ප්‍රහාර එල්ල කර ඇති බවයි.

වෙඩි තැබීම සිදුවන අවස්ථාවේ රිහානා හෝ ඇගේ දරුවන් නිවසේ සිටි බවට මෙතෙක් ස්ථිර වාර්තාවක් ලැබී නැත.

සාමාන්‍යයෙන් මෙවැනි අවස්ථාවලදී ආරක්ෂක හේතූන් මත ප්‍රසිද්ධ පුද්ගලයන් සිටි ස්ථානය හෙළිනොකිරීමට බලධාරීන් වගබලා ගනී.

ලොස් ඇන්ජලීස් පොලිසිය ප්‍රකාශ කළේ, සිදුවීමෙන් කිසිවෙකුටත් තුවාල සිදුවී නොමැති බවයි.

අත්අඩංගුවට ගත් 35 හැවිරිදි කාන්තාව රිහානාගේ දැඩි රසිකාවියක හෝ පෞද්ගලික අමනාපයක් ඇති අයෙකු විය හැකි බවට සැකපිට විමර්ශන ක්‍රියාත්මක වේ.

ඇය භාවිත කළ සුදු පැහැති ටෙස්ලා රථය පසුව පොලිසිය විසින් සොයාගන්නා ලදී.