නේපාලය, ඉන්දියාව සහ ශ්‍රී ලංකාව අතර ක්‍රියාත්මක වන අන්තර්ජාතික මත්ද්‍රව්‍ය ජාවාරම් ජාලයක් වටලා, රුපියල් මිලියන 100ක් පමණ වටිනා මත්ද්‍රව්‍ය සමග සැකකරුවන් පස් දෙනෙකු අත්අඩංගුවට ගැනීමට ඉන්දියාවේ මත්ද්‍රව්‍ය පාලන කාර්යාංශය සමත්ව තිබේ.

ඉන්දියාවේ මත්ද්‍රව්‍ය පාලන කාර්යාංශයේ හයිද්‍රාබාද් සහ චෙන්නායි කලාපවලට අයත් ඒකක විසින් සිදු කරන ලද සම්බන්ධීකරණ මෙහෙයුමකදී හෂිෂ් තෙල් කිලෝග්‍රෑම් 77.6ක් සහ චරස් ගංජා කිලෝග්‍රෑම් 2ක් අත්අඩංගුවට ගත් බව ඉන්දීය බලධාරීන් පවසා ඇත.

මාර්තු 3 වැනිදා ඉන්දියාවේ මත්ද්‍රව්‍ය පාලන කාර්යාංශයේ හයිද්‍රාබාද් ඒකකයේ නිලධාරීන් තෙලන්ගානා හි බැංගලෝර්-හයිද්‍රාබාද් අධිවේගී මාර්ගයේ රයිකල් ටෝල් ප්ලාසා අසල ටාටා සෆාරි ස්ටෝම් රථයක් අල්ලා ගැනීමත් සමග මෙහෙයුම ආරම්භ විය.

වාහනය පරීක්ෂා කිරීමේදී විශේෂයෙන් වෙනස් කරන ලද මැදිරිවල සඟවා තිබූ චරස් ගංජා කිලෝග්‍රෑම් 2ක් සොයා ගැනීමට හැකි වී තිබිණි.

සිද්ධියට අදාළව දිල්ලි සහ උත්තර් ප්‍රදේශ් පදිංචිකරුවන් දෙදෙනෙකු එම ස්ථානයේදීම අත්අඩංගුවට ගන්නා ලදී.

වැඩිදුර පරීක්ෂණවලදී හෙළි වී ඇත්තේ මෙම මත්ද්‍රව්‍ය නේපාලයේ කත්මණ්ඩු සිට සොනෝලි දේශසීමාව හරහා ඉන්දියාවට හොර රහසේ ගෙන යන ලද විශාල තොගයක කොටසක් බවයි.

නිලධාරීන් පැවසුවේ මත්ද්‍රව්‍ය තමිල්නාඩුවේ තූතුකුඩි වෙත ගෙන යෑමට පෙර ප්‍රාන්ත කිහිපයක් හරහා ප්‍රවාහනය කර ඇති බවයි.

බුද්ධි තොරතුරු මත ක්‍රියාත්මක වූ ඉන්දියාවේ මත්ද්‍රව්‍ය පාලන කාර්යාංශයේ චෙන්නායි ඒකකය පසු විපරම් මෙහෙයුමක් සිදුකර ශ්‍රී ලාංකික සරණාගතයකු ඇතුළු පුද්ගලයන් තිදෙනෙකුගෙන් හෂිෂ් තෙල් කිලෝග්‍රෑම් 77.6ක් පමණ අත්අඩංගුවට ගත් අතර, එමඟින් මුළු අත්අඩංගුවට ගැනීම් පහ දක්වා ඉහළ ගියේය.

ජාවාරම්කරුවන් තූතුකුඩි වෙරළ තීරයේ සිට මත්ද්‍රව්‍ය ප්‍රවාහනය කර ධීවර බෝට්ටුවක් භාවිත කරමින් මුහුද මැද දී ශ්‍රී ලාංකිකයකුට මත්ද්‍රව්‍ය භාර කිරීමට සැලසුම් කර ඇති බව විමර්ශකයන් සොයාගෙන තිබේ.

ඉන්දීය වෙරළාරක්ෂක බලකායේ සහාය ඇතිව, සැක සහිත බෝට්ටුව අන්තර්ජාතික සමුද්‍රීය සීමා රේඛාව අසලදී අත්අඩංගුවට ගෙන මාරු කිරීම වළක්වන ලදී.

තොගයේ අපේක්ෂිත ලබන්නා යැයි විශ්වාස කරන ශ්‍රී ලාංකික ජාතිකයකු සහ නේපාලයෙන් නැව්ගත කිරීම සඳහා මුදල් යෙදවූ සහ සම්බන්ධීකරණය කළ පුද්ගලයා ද හඳුනාගෙන ඇති බව බලධාරීන් ප්‍රකාශ කර ඇත.

මූල්‍ය ජාලය සොයා ගැනීමට සහ ජාවාරමේ සෙසු සාමාජිකයන් හඳුනාගැනීමට වැඩිදුර පරීක්ෂණ සිදු වෙමින් පවතී.